Hemsereka Pêroyî ya Komeleya Heqanê Merdiman Eren Keskîne derheqê vengdayîşê Ocalanî yê ‘Ez seba çareserîye amade ya’ de dîyar kerde ke ganî dewlete muhîmî bida nê vengdayîşî û wina dewam kerde: “Seba ke Tirkîya de huzûr bibo, tena rayîrêk esto, o zî averberdişê polîtîkayanê aştîye yo.”

NACÎ KAYA/BARIŞ CEYHAN / MA/STENBOL

Rayberê Şarê Kurdî Abdullah Ocalanî wexto ke 7ê Hezîrane de avûkatanê xo reyde pêvînayîş kerdbî, pêvînayîş de mesajê ‘Ez eşkena çareser bikera, bawerîya mi esta û ez seba çareserîye amade ya, labelê ganî aqlê dewlete zî çîyo ke hewce keno bikero’ dabi. Vatişê Ocalanî heta nika hetê xeylê hetan ra bi hawayo bîyaye ame erjnayene.

Hemsereka Komeleya Heqanê Merdiman Eren Keskîne zî da zanayene ke ganî no mesaj hetê dewlete ra bi hawayo muhîm bigîrîyo dest. Keskîne qiseykerdişê xo de va ‘şero ke herême de esto, netîceyê polîtîkayanê çaresernêkerdişî de vejîyeno werte’ û wina dewam kerde: “Ez bi serran o herême de xebatan kena. Heta nika mi Kurdêko ke aştîye nêwazo, nêdîyo. Çimkî ewro tewr zaf lazimîya Kurdan bi aştîye esta. Coka vatişê Ocalanî zaf muhîm î.”

Keskîne va ‘Ocalan seba Kurdan zaf muhîm o’ û wina domnaye: “Coka ganî muhîmî bidîyo vengdayîşê ci. Eke polîtîkayê pêrodayîşî dewam bikerî, o wext do cîyakarî û nîjadperestîye zî zêde bibî. Ma benî şahid ke demanê peyênan de nîjadperestîye senî zêde bena. No semed ra ganî ma heme polîtîkayanê aştîye ser o bivinderî û înan qisey bikerî.”

AKPyî dewleta xorî reyde pê kerd

Keskîne vatişê Ocalanî yê ‘Ganî dewlete û aqlê dewlete zî çîyo ke hewce keno, bikero’ ser o vindete û wina va: “AKP bitaybetî 2015 ra dima dewleta xorî reyde pê kerde. MHP û parçeyê bînî yê dewleta xorî serranê 90î de bi Mehmet Agar, Tansû Çîllere û sewbîna kesan dir pê kerdî û no zî bi sebeb ke polîtîkayê nêçareserîye zêde bibî. Goreyê mi wexto ke Ocalan qala aqlê dewlete keno, xîtabê heme aqlan keno. Ganî nêyî heme polîtîkayanê aştîye ra vajî temam. Tena çareserîye bi no hewa beno. Tirkîya tena eşkena bi polîtîkayanê çareserîye bireso rehetîye.”

Wa dewlete têrî bimano

Keskîne qiseykerdişê xo de va ‘çareserîya problemê Kurdan asan nîyo’ û wina dewam kerde: “Problemê Kurdan problemêko mîyanneteweyî yo û tena Tirkîya eleqeder nêkeno. Cografyaya Kurdîstanî 4 dewletan eleqeder kena û hêzê emperyalî zî na cografya wazenî. Labelê parçeyo tewr bitesîr parçeyo ke ma tede cuyenî yo. Tîya de çareserîyêk aver şêro, do heme Kurdîstanî ser o tesîr bikero. PKK ra ver zî dewlete Kurdan de şer kerdêne. Coka gerek dewlete tarîxê xo reyde têrî bimano. Çimkî 1938 de PKK çinêbi. Labelê dewlete o wext vera Kurdan de şer kerdêne. Eke problemê Kurdan çareser bibo, o wext xeylê problemê Tirkîya zî çareser benî.”

Ganî îdeolojîyo tek tîp bêro muhakemekerdene

Keskîne bale ante vatişê Ocalanî yê ‘Ganî têkilîyê Tirk û Kurdan ke Xelat û Milazgîr de dest pêkerdî û heta Qanûno bingeyî yê 1921î ameyî bêrî taqîbkerdene’ ser û wina qedênaye: “Tirkîya de hetê ke xo sey rastgir, çepgir û lîberal şinase kenî, heme zî bingeyê xo îdeolojîyo tekperest ra gênî. Sey nimune ê ke xo çepgir şinase kenî, nêşênî Qirkerdişê 1915î munaqeşe bikerî. Ganî îdeolojîyo fermî xo muhakeme bikero. Eke şima ewro hîna zî vajî ‘tena çare Kemalîzm o’, o wext şima ra çîyêk nêvejîyeno. Ganî heme polîtîkayê îttîhatperestî bêrî munaqeşekerdene. Qanûno bingeyî yê 1921î goreyê yê bînan hîna demokratîk o. Coka ganî o qanûno bingeyî bêro munaqeşekerdene.”