Zîndanan de peynîya zext û îşkenceyan nîna û zîndanî bîyî cayê teslîmbîyayîşî. Hepsîyê ke Zîndanê Tîpa Tyî yê Duzce de manenî, bi rayîrê keyeyê xo dîyar kerdî ke ê 3 rojî yo ke îşkence vînenî û vatî ‘wa haya raya pêroyî ma ra bibo, ti ewleyîya ma çin a’.

Herçiqas ke rewşa îstîsnayî (OHAL) bi hawayo fermî ameya wedarnayene zî kerdişê ke zîndanan de benî, hîna dewam kenî. Bitaybetî zîndanê Xarpêt, Tarsûs, Wan, Duzce û sewbîna xeylê zîndanan de hepsîyî raştê zext û îşkenceyan yenî.

Înîsîyatîfê Piştîdayîşyewbînanî yê Zîndanan avûkat Bunyamîn Şekerî qisey kerd û bitaybetî qala kerdişanê zîndanê Xarpêtî kerdî. Şekerî dîyar kerd ke hepsîyî bi odeyê singerinî yenî tehdît kerdene, rojname û kovarî nêdîyenî hepsîyan û raştê heqaret û tacîzan yenî.

Şekerî va ‘tewr zaf neheqîyî zîndananê Tarsûs, Wan û Xarpêt de yenî cuyayene’ û wina dewam kerd: “Bitaybetî Xarpêt de kerdişê faşîstî dewre de yî. Seba ke zîndan de 3 îdareyê cîya estî, kerdişî zî cîya yî. Hepsîyan yeno waştene ke wa payan ser o hûmare bidî. Seba ke hepsîyan qebul nêkerdo, ameyî derb kerdene. Zîndan de nizdîyê 300 hebî odeyê yew kesî estî û nizdîyê 60 hepsîyî nê odeyan de manenî. Hepsîyan ra yê ke mehkemeya înan dewam kena yan zî cezaya înan tesilî nêbîya, nê odeyan de yenî vindarnayene. Ma bi xo zî ge-ge raştê hêrişan yan zî vengê hepsîyan yenî.”

Kantînî bîyî cayê rantî

Şekerî qiseykerdişê xo de va ‘hepsîyê nêweşî nînî tedawî kerdene’ û da zanayene ke hepsîyanê nêweşan ra Leşker Acar, Yaşar Kirmiz û Gurbuz Topçu odeyanê yew kesan de manenî û bi hawayo kelepçe hetê îdareyî ra erşawîyenî nêweşxaneyan. Şekerî qiseykerdişê xo de qala kantînanê zîndanî zî kerd û wina va: “Xeylê çîyî seba ke kantînan de yenî rotene, teber ra nêgirîyenî. Labelê çîyê ke teber de erjan î, zere de zaf vaye yî. Wexto ke waştişnameyî bi hawayo komkî yenî dayene, îdareyê zîndanî wazeno ke wa hepsîyî yew bi yew bidî. No zî beno mesrefin. Rojnameyê Yenî Yaşamî nêdîyeno hepsîyan. Kantînî bîyî cayê rantî.

Hepsîyî îşkence vînenî

Zîndanê Tîpa Tyî yê Duzce de zî zext û îşkenceyî dewam kenî. 32 hepsîyî ewja de manenî û bi rayîrê keyeyê xo qala îşkenceyan kerdî. Hepsîyan ra Ahmet Akbalikî telefon de qala îşkenceyo ke înan rê beno kerdo. Waya Akbalikî Dîlek Akbalike va ‘hepsîyan seba ke payan ser o hûmare nêdaya, 3 rojî îşkence dîyo’ û daye zaneyene ke ewleyîya hepsîyan çin a.

Wa haya şima ma ra bibo

Dîlek Akbalike dîyar kerde ke roja 28ê êlule înan Ahmetî reyde qisey kerdo. Akbalike va ‘Senî ke mi telefon akerd, Ahmetî va; Wayê, vengê mi qeyd bike’ û qala vatişanê birayê xo kerde û wina va: “Wayê, 3 rojî yo ke ma îşkence vînenî, danî ma ro. Mudurêko newe ameyo, bi hawayo kêfî hereket keno. Derbî ver, goşêkê mi nêeşnaweno û heme cayê ma sîya bîyî. Înan ma eştî koguşanê cîyayan û xebera ma yewbînan ra çin a. Ti ewleyîya ma çin a.”

Akbalike va ‘çira îşkenceyê înan kenî?’ û muracatê Komeleya Heqê Merdiman ya Şûbeyê Amedî kerd.

 

MA / AMED