Ewropa de 7ê Hezîrane ra nata nizdîyê yew hewte yo raydayîş dest pêkerdo. Sere de Almanya, Avusturya û Fransa û dima ra welatanê bînan de raydayîş dest pêkerdbi û xeylê welatanê bînan de zî peynîya hewteyî dest pêkeno.
Babete ser o Hemserekê Kongreya Komelê Demokratîke ya Kurdistanî ya Ewropa (KCDK-E) û Endamê Koordînasyonê Weçînayîşî yê Ewropa yê HDPyî Yusel Koçî qisey kerd û melumatê muhîmî dayî. Koçî dîyar kerd ke eleqeyêko gird weçînayîşan rê esto, labelê hîna zî qaso ke ma wazenî, nîyo û wina domna: “Ganî komîsyonê ma yê weçînayîşî no het de seferberî îlan bikerî. No weçînayîş seba ma zaf muhîm o. Cok ra ganî herkes raya xo bikar bîyaro. Tena komîsyonî nê, wa namzed, xebatkar û sewbîna herkes dormeyê xo bikirêşo.”
Koçî dewamê qiseykerdişê xo de qala raydayîşî kerd û wina va: “Wa weçînitoxî her di pusulayan zî bikar bîyarî. Eke wina nêkerî, raya înan betal bena û xizmetê Erdogan û AKPyî keno. Wa nêkewî heyecan û bi hawayo sakîn raya xo bidî. Tayê kesî pusulayan ser o hîsanê xo nusenî. Wa herkes bizano ke no beno sebebê betalbîyayîşî. Ez rîca kena ke wa wina nêkerî. Heto bîn de ser medyaya komelkî de tayê melumatê şaşî gêrenî û no bi hawayo zanaye hetê çeteyanê AKPyî ra yeno kerdiş. Ge-ge ê pare kenî û dima ra embazê ma zî pare kenî. Xora waştişê înan o yo ke sereyê merdimanê ma têmîyan bikerî. Wa embazê ma baldar bibî. Heta ke Temsîlkarîya Ewropa ya HDPyî û Koordînasyonê Weçînayîşî îzehetêk nêdî, wa bawerîya xo nînan rê nîyarî.”
ANF/DUSSELDORF