Şirnex de mabênê 16ê adare û 14ê teşrîna peyêne de qedexeyê tebervejîyayîşî estbî û dima ra seba ke banê tayê keyeyan ameybî rijnayîş, koçê dewe û qezayanê dormeyan kerdbî. Têkoşînê cuye yê nê keyeyan dewam keno.
Keyeyê ke dewa Avgamasyaya 5 kîlometre dûrê bajarî de ya bica bîyî, bi ameyîşê zimistanî xeylê zehmetîyan reyde têrî mendî. Seke yeno zanayîş dezgeyê Heyva Sor a Kurdistanê seba şirnexijan ‘Kampanyaya 1000 Keyeyê Waye û Birayî’ daybî destpêkerdiş. Nê keyeyî seba kampanyaye veng dayî.
Emîne Katare seba ke banê aye yo 3 qatin amebî rijnayîş, mecbûr mende ke koçê dewe bikero. Katare bale ante muhîmîya kampanyaye ser û wina va: “Ma serranê 90î de seba ke dewê ma ameybî veşnayîş, koçê merkezê Şirnexî kerdbî. Ma mîyanê zehmetîyan de banêk viraşt. Ma qedexe ra dima demêk çadire de mendî. Banê tîya saxlem nîyo. Wa herkes seba kampanyaye hesas bibo.”
Awe û cereyan hertim birîyenî
Keyeyê Kulterî 11 kesan ra pê yeno û ê zî dewe de bica bîyî. Endamanê keyeyî ra Omer Kulter zî dêsê banê xo dano piro. Kulterî va ‘ma şert û mercan ver nêşênî domananê xo bierşawî mekteb’ û wina dewam kerd: “Cereyan nêdîyena ma û awa ma zî hertim birîyaye ya.”
Taybet Ongeye zî wexto ke banê înan rijîyeno, verê şonî Silopî, dima ra şonî Dêrgule û tewr peynî zî yenî Avgamasya de bica benî. Ongeye va ‘bi ameyîşê zimistanî cuya ma hîna zehmetin bîya’ û wina domnaye: “Ma banê xo ra çîyêk nêgirewtbî. Nika TOKÎ banan virazena. Bananê ma yê hîrayan rijnayî, herinda înan de yê tengan virazenî. Ma nêşênî ê banan de bicuyî.”
Nedîm Sondakî zî wina va: “Ma saya merdimanê xo de xo rê dewe de ban viraşt. Êdî hewa serd bena. Ma mecbûr î ke lazimîyanê xo bîyarî ca. Ez veng dana herkesî ke wa piştî bidî şirnexijan.”
MA/ŞIRNEX