Çend rojî verê Mehmet Ocalanî Rayberê Şarê Kurdî Abdullah Ocalanî reyde pêvînayîş kerdbî. Mehmet Ocalanî derheqê pêvînayîşî de da zanayene ke Ocalanî seba yewîya Kurdan çi bikewo milê ma, ma do bikerî û wina vato: “Operasyonî do zirar bidî yewîya Kurdan. Cok ra ganî herkes seba yewîya Kurdan fedakarî bikero û bixebetîyo.”

BARIŞ POLAT / MA/RIHA

Mehmet Ocalan bi wesîleya Roşanê Qurbanan 12ê Tebaxe de şibi Girawa Îmrali û Rayberê Şarê Kurdî Abdullah Ocalanî de pêvînayîşêk kerdbî. Seke yeno zanayene Mehmet Ocalan tewr peynî 5ê Hezîrane de pêvînayîş kerdbi. Mehmet Ocalanî derheqê teferruatanê pêvînayîşî de melumat da.

Mehmet Ocalano ke 2016 ra nata 3 reyî pêvînayîşî kerdî, dîyar kerd ke pêvînayîşo peyên pêro pîya saetêk dewam kerd û da zanayene ke ganî pêvînayîşê keyeyî 2 hewte de reyêk bêro viraştene. Mehmet Ocalanî qiseykerdişê xo de qala muhîmîya xoverdayîşê serra 2019î kerde û va ‘Serra 2019 serrêka ke qet nêro vîrakerdene ya, çimkî seba wedarnîyayîşê tecrîdî 9 kesan xo feda kerd’.

Mehmet Ocalanî pêvînayîş de bale ante sehnayîşê rûtî ser û wina va: “Ez 20 serrî yo ke şona û yena. Ê mi baş şinasnenî. Sehnayîşê rûtî mi ser o ferz kerd. No nîno qebulkerdene. Wa ê kesê ke wina kerd, wa xo ra şerm bikerî.”

Ez paweyê ameyîşê şima nêbîya

Mehmet Ocalanî va ‘her pêvînayîş de rîyê mi ver bi berî de bîyêne, labelê na reye înan waşt ke ez rîyê xo tada’ û wina domna: “Serek ame, ez tadîyaya û ma destê yewbînan tepişt. Serekî mi ra va ‘ez paweyê ameyîşê şima nêbîya, sankî şima bi tesadufî ameyî’. Dima ra rojeva welatî mi ra pers kerde. Mi zî dîyar kerd ke 3 rojevê esasî estî û mi înan wina rêz kerdî; Vakur û Rojhelatê Sûrîye, Operasyonê Pençe û zext û tedayê ke dezgehan ser o estî.”

Şer reyde çareserîye nîna

Mehmet Ocalanî qiseykerdişê xo de derheqê Vakur û Rojhelatê Sûrîye de vatişanê Ocalanî wina neqil kerd: “Hem Tirkîya, hem zî do şarê ewja zirar bivîno. Şer reyde nêbeno, ganî çareserîye bibo. Eke Tirkîya biwazo bikewo Sûrîye, no asan nîyo. Ya raşt na ya ke şer çîyêk şaran rê nêano. Ez 20 serrî Sûrîye de menda û şarê ewja baş şinasnena. Ez eşîranê Ereban yê ewja baş şinasnena. Têkilîyê mi înan dir estbî. Silamanê mi ê eşîran û şarî rê bike. Problem ancax bi demokrasî çareser beno. Heta nika şer reyde qet çareserîye nêameya.”

Wa herkes seba yewîye fedakarîye bikero

Goreyê vatişê Mehmet Ocalanî, Ocalanî derheqê Operasyonê Pençe de wina vato: “Ma seba çareserîye çi bikewo milê ma, ma do bikerî. No mesele bi rijnayîşê gonîye çareser nêbeno. Ma seba aştîye hertim estî. Ma do hertim vera şerî de bivinderî, ganî herinda şerî de aştîye bibo. No operasyon do zirar bido yewîya Kurdan zî. Cok ra ganî herkes seba yewîya Kurdan fedakarî bikero û bixebetîyo.”

Şarî rê xizmet bikerê

Vatişanê Mehmet Ocalanî gore, Rayberê Şarê Kurdî Ocalanî seba Partîya Demokratîke ya Şaran (HDP) zî mesajêk erşawito û wina vato: “60 parlamenterî estî û şaredarîyî zî ameyî girewtene. Mi pêvînayîşo bîn de zî vatbi, eke ez teber de bibîyêne, mi do ziqaqan pake bikerdêne. Ganî parlamenterî 24 saetî mîyanê şarî de bibî. Partî dezgehêko demokratîk a, îradeya şarî ya û ganî xizmetê şarî bikera. Şar îradeya xo teslîmê înan kerda, ê zî xizmetkarê şarî yî.”

Mehmet Ocalanî peynîye de dîyar kerd ke Ocalanî Roşanê Qurbanan yê heme şaranê Rojhelatê Mîyanên û Tirkîya pîroz kerdo.