Dezgehê Keyeyanê Şehîd û Vîndîbîyayan ê Ewropa (KOMAW) do 28ê Êlule roja Şeme bajarê Dusseldorfî yê Almanya de vera polîtîkayanê serdest û kiştox ê dewleta Tirkî de mîtînge û rayraşîyayîşêk virazo.
KOMAWî seba beşdarbîyayîşê çalakîye îzehetêk da. KOMAWî vato ‘Kurdî şaranê kehenan ê Rojhelatê Mîyanênî ra yê’ û wina dewam kerdo: “Dewleta Tirkî bi polîtîkaya qirkerdişî ya fîzîkî û kulturkî wazena ke Kurdan çin bikera. Dewleta Tirkî seba qirkerdişê Kurdan temam bikero her wextî ra zafêr şer kena giranêr. Hetêk ra vera Rojawan û Başûrê Kurdîstanî de hêrişê dagîrkerîye yenê kerdene, hetê bînî ra zî Vakur de bi qayûman îradeya şarî xesp kena.”
Komawî dewamê îzehetê xo de vato ‘dewleta Tirkî ya ke di ser verê cû Efrîn dagîr kerd, nika zî wazena bajaranê bînan dagîr bikera û rayîr dana çeteyanê DAÎŞî’ û wina qedênayo: “Reng, ziwan û bawerîya xo çi beno wa bibo, ganî her kesa/o wayîrê wijdanî vengê xo berz bikero/a û sucanê vera merdimîye de rê vajo/a ‘Êdî bes o’. Rayberîya dezgehanê keyeyanê şehîdan de do roja Şeme Dusseldorf de bi beşdarbîyayîşê gazîyanê ke şer de birîndar bîyî, keyeyê şehîdan û şarê ma mîtîngêk virazo. Ma wazenê polîtîkayanê qirkerdişî yê dewleta Tirkî yê vera Kurdan de bidê eşnawitene û vera neheqîyan de vengê xo berz bikerê.”
DUSSELDORF