YASÎN KOBULAN / MA / STENBOL
Rojnameger Omer Çelîk, Tunca Ogreten û Mahîr Kanaat seba ke maîlê Wezîrê Enerjîyî Berat Albayrakî ke hetê Redhackî ra ameybî deşîfrekerdiş, kerdbî xebere 10 aşmî yo ke tewqîfkerde yî. Rojnamegerî do roja sêşeme bivejyî hakimî ver.
Babete ser o Unîversîteya Bîlgî de akademîsyen Yaman Akdenîzî qisey kerd. Akdenîzî va ’10 aşmî seba rojnamegerêkî demêko derg o’ û wina dewam kerd: “Destpêkerdişê mehkeme şansê tehlîyebîyayîşî zêdeneno. Şertê normalan de ganî bi hawayo nêtewqîfkerde biameyênê mehkemekerdiş. Labelê 15ê Temmuze ra dima dozê rojnamegeran de rewe bi rewe qerarê tehlîye nêvejîyenî.
Muhtewaya maîlan deşîfre bîya
Akdenîzî qiseykerdişê xo de qala waştişê mudaxilbîyayîşî Albayrakî zî kerd û wina va: “Wezîr waşt ke mudaxilê doze bibo. Labelê maîlê wezîrî hetê nê rojnamegeran ra nêameyî deşîfrekerdiş. Nê rojnamegerî cuya taybete ya ti kesî deşîfre nêkerdî. Heto bîn ra seba ke merdim tayê melumatan ra vajo sirê dewlete yî, ganî nê melumatê fermî bibî. Labelê badê ke maîlê wezîrî ameybî deşîfrekerdiş, hema zî hetê Wîkîleaksî ra yenî weşênayîş. Cok ra nê belgeyî deşîfre bîyî. Eke nê melumatî rayapêroyî eleqeder kenî, o wext no mîyanê sînorê azadîya îfadeyî de yo. Cok ra ganî mehkeme waştişê mudaxilbîyayîşê red bikero. Ganî her 3 rojnamegerî tehlîye bibî.”