RENGÎN AZÎZOGLU / JINNEWS / AMED
Parlamentera HDPyî ya Amedî Salîha Aydemîre derheqê mesajê Rayberê Şarê Kurdî Abdullah Ocalanî ke pêvînayîşê 2ê Gulane de dabî de qisey kerde û hişyarîyê muhîmî kerdî. Aydenîze daye zanayene ke 8 serran ra pey pêvînayîş ame kerdene û no nîşan dano ke Tirkîya 8 serran ra dima goreyê qanûnê xo yê bingehênî hereket kerdo.
Aydenîze va ‘Ocalan 20 serrî yo ke Îmrali de binê tecrîdî de yo’ û wina domnaye: “Birêz Ocalan 20 serrî yo xover dano. Netîceyê nê xoverdayîşî de 2ê Gulane de pêvînayîş ame kerdene. Birêz Ocalanî deklarasyono ke 7 madeyan ra pê yeno erşawit. Deklarasyon nîşan dano ke Birêz Ocalan sîyaseto demokratîk de israr keno. Reyna deklarasyon de aseno ke Birêz Ocalan çiqas seba Tirkîya û Rojhelatê Mîyanênî têkoşîn dano. Ganî muxatabê ci nê deklarasyonî baş fam bikerî.”
Aydenîze va ‘ewro dayîkî erdan ra kirancîyenî’ û wina dewam kerde: “Ma seba ke Tirkîya biba demokratîke gaman erzenî û ma do bierzî zî. Ma goreyê qeydeyanê xo hereket kenî. Seba ke Tirkîya biba demokratîke, eke lazimîye bi eştişê gaman bibo, HDPyî 31ê Adare de na game eşta. Wa kurdî û hetê demokratîkî pêvînayîşê 2ê Gulane sey gamêk nêvînî. Şarî heta nika bi weçînayîşan çîyêk qezenç nêkerd. No şar bi dayîşê bedelan heta ewro ameyo. Ma do na nuqta ra têkoşînê xo bidomnî.”
Aydenîze bale ante çalakîya dayîkan ser û wina va: “Bi hawayêko hovane hêrişê dayîkan kenî û no zî nîşan dano ke hêzê dayîkan ra çîyêk fam nêkerdo. Dayîkî her warî de xover danî û her roje ziqaqan de yî. Ma zî hetê dayîkan de yî. Dayîkan rê tewr xelata başe aştî, demokrasi û edalet o. Ma tîya ra veng danîİ; heta ke erey nêbîyo, wa gaman bierzî.”