Vera hêrişê dagîrkerîye yê artêşa Tirkî û çeteyanê ci ke 9 rojî yo dewam keno de reaksîyonî her ke şono zêde benî. Parlamentera HDPyî ya Riha Ayşe Surucu babete ser o ajansê Mezopotamya rê qisey kerde û dîyar kerde ke reaksîyonê rayapêroyî yê dinya kêmî yî, ganî gamê pratîkî bêrî eştene.
Surucu va ‘ma sîstemêko faşîst de têrî yî’ û wina dewam kerd: “Îqtîdar Kurdan ser o zextan keno ke sîyasetê demokratîke çin bikero. Xora sîyasetmedarî yenî tepiştene û herinda înan de qayûmî yenî eştene. Bi no hewa îradeya şarî yena xespkerdene. No zî bes nêbi, nika zî hêrişê Rojawanî yeno kerdene û no şer vera Kurdan de beno. Şarê Rojawanî vera çeteyanê DAÎŞî de ser kewt û cuyêka nêwe awan kerde. Tirkîya na cuye hezim nêkerd û nika hewl dana nufûsê ewja bibedilno. Ma do hertim hetê Rojawanî de bibî.”
Surucu dewamê qiseykerdişê xo de da zanayene ke heta nika Rojawan ra kerrayêk daxî nêerzîyaya Tirkîya û wina va: “Labelê Tirkîya Rojawanî sey dişmenî vînena. Çira? Çimkî şarê Rojawanî ewja de îdareyêko newe awan kerd. Nameyê hêrişê ‘Çimeyê Aştîye’ ameyo ronayene, labelê ê çimeyan ra gonîye herikîyena. 9 rojan de sivîl û rojnamegerî merdî. Hesaban ra sivîlî ameyêne pawitene. Ewja de Kurd, Tirkmen, Êzidî, Ereb, Suryanî û sewbîna herkes bi nasnameyanê xo kantonan de cuyenî.”
Ma hetê şarê xo de yî
Surucu va ‘rayapêroyîya dinya vera hêrişan de reaksîyon nîşan da’ û wina qedênaye: “Labelê no bes nîyo. Ganî seba vindarnayîşê şerî gamê pratîkî bêrî eştene. Çimkî DAÎŞo ke bibi belaya sereyê dinya ame qedênayene. Ganî rayapêroyî zî şerê Tirkîya bivindarno. Ma wazenî ke wa şer nêbo. Ma do heta peynî hetê şarê xo de bibî û têkoşînê xo bidomnî.”
RIHA