Cemîyetê Rojnamegerê Azad (CRA) seba serbestverdayîşê rojnamegerê ke Kurdistan û Tirkîya de wextê ke karê xo kerdênê ameybî tepiştiş, dest pê kampanyaya îmzeyan kerd. Babete ser o hemserekê CRAye Hakki Boltan qalî kerd.
Hêrîşê girdî benî
Boltan ciresna ke bi taybetî demo peynî de hêriş û zextî dijî rojnamegeran xeylê vêşî bîyî û wina verdewam kerd: “Hedefê nê hêrişan, astengkerdişê karê rojnamegerî yo û tersnayîşê rojnamegeran î. Wazenî rojnamegerê ke Kurdistan û Tirkîya de raştîyan nusenî, bi temamî werte ra wedarnî. Kultirê ma kultirê xoverdayîşî yo, kultirê serenêronayîşî yo. Ma bi no hawa verpersîyarîya xo anî ca. No semedî ra ma sey CRA wezîfeyê xo anî ca û kampanyaya îmzeyan danî destpêkerdiş. Ma bi na kampanya wazenî rojnamegerê xoverdakar tena veranêdî û paştî bidî înan.”
Des hezar îmze lazim î
Boltan qalîkerdişê xo de veng da heme rojnameger û dormeyê demokratîke û wina vat: “Kesê ke wazenî beşdarê kampanya bibî, eşkenî bi keyepela CRA-OGCe xo biresnî metnê îmzeyan. Ma wazenî encamê na kampanya de des hezar îmze kom bibî. Ger ke îmzeyî des hezarî ra bivîyarî do bandorêko gird bivirazo. Ma do bi îmzeyanê xo sere bidî Dadgeha Destûrê Bingeyî ra û înan ra peynîkerdişê na bêhuqiqî biwazî.”