Rêxistinê êzidîyan vera hêrişê PDKyî yê ke dewleta tirkî reyde pîya hêrişê Şengalî kerdbî de îzehetêko nuştekî dayî.
Destpêka îzehetê rêxistinan de ameyo vatiş ke ‘prosesêko winasî ke her roje seba yewîya neteweyî vengdayîşî yenî kerdiş û şarê kurd xoverdayîşêko gird nîşan dano de, PDK hetê hukmatê AKPyî de ca gêno.’
Îzehetî de hayr ancîya zîyaretê Serekê PDKyî Mesud Barzanîyî yê Tirkîya ser û wina vajîya: “No zîyaretî yewna rey nîşanê ma da ke, PDK hetê dişmenê kurdan de ca gêno. PDKyî seba ke vernîya qezencanê şarê êzidî bigiro, bi nameyê ‘Pêşmergeyê Rojawanî’ de grûbêk erşawito Şengal.“
Bi talîmatê Erdoganî
Dewamê îzehetî de wina ameyo vatiş: “Sey ke yeno zanayîş qezaya Xanesorî hetê şerwananê HPG û YBŞyî ra netîceyê têkoşînêko gird de destê çeteyanê DAIŞî ra ameybî girewtiş. Serekê PDKyî Mesud Barzanîyî bi talîmatê Erdogan û AKPyî qerarê hêrişê Şengal û Rojawanî kerdişî girewto.“
Peynîya îzehetî de veng ame dayîş ke ‘wa ti kes vera nê provakasyonî de bêveng nêmano’ û îzehet wina qedîyayo: “Ma veng danî şarê xo yê Başûrê Kurdistanî, wa vera sîyasetê PDKyî de bêveng nêmanî. Wa qerargehanê leşkeranê tirkan yê Başûr de qebul nêkerî. Ma veng danî ciwanê kurdî ke mîyanê ‘Pêşmergeyanê Rojawanî’ de ca gênî, wa sîlehanê xo veradî û hetê şarê xo de ca bigirî. Wa konseptê Erdoganî de ca nêgirî. Wa sere de şarê ma yê Ewropa û heme şarê ma biwerzî lingan ser.”
Rêxistinê ke na îzehet îmze kerdî nê yî: “Merkezê Yewîya Komelê Êzidîyan (NAV YEK), Banê Meclîsê Cinîyê Êzidî (SMJÊ), Yewîya Ciwananê Êzidî (HCÊ), Meclîsê Şengalî yê Dîaspora (MŞD), Platformê Hunermendê Kurdê Êzidî (PHKÊ), Meclîsê Dewê Êzidîyê Vakurî, Keyeyê Êzidîyan yê Kantonê Cezîrî, Komeleya Êzidîyan ya Kantonê Efrînî, Îttîfaqê Êzidîyê Sûrîye (HÊS), Keyeyê Êzidîyan yê Sîegenî.”
BRUKSEL