Endamê Konseyê Caardişî yê Koma Komelê Kurdistanî (KCK) Sabrî Okî derheqê rojeva sîyasî ya pêroyî ya Tirkîya de qisey kerd. 

Okî vist vîrî ke ‘Gulenî waşt derbe bivirazo la derbeya esil hetê Erdoganî ra ameya viraştiş’ û wina va: “Erdogan hewl dano dîktatorîyêka sey Evrenî awan bikero. Dîktatorîya Erdoganî û faşîzmê AKPyî Tirkîya ardo cayêko bitehluke. Erdogan heme krîz û problemanê Tirkîya kirişeno Sûrîye, Rojawan û Rojhelato Mîyanên. Nika sereyê Erdoganî bela de yo. Erdogan wazeno rolê Enwer Paşayî kay bikero û seba nêyî zî dîktatorîya xo awan keno. Cok ra Erdogan vera şarê kurd û şaranê bînan yê ke xover danî de seferberîye îlan kerdo. Yanî hem kurdan kişeno û bajaranê înan rijneno û cinî, doman û extîyar nêvano, hemînan qetil keno û dima ra vera şarê xoverdakaran de vano ‘çimê nê şaran erdê ma de esto’ û sefereberîye îlan keno. Raştîya xo de yê ke lazim o seferberîye îlan bikero, no şaro ke vera faşîzmî de têkoşîn dano yo.” Okî dewamê qiseykerdişê xo de va ‘hêzê çeteyî yê sey SADAT û Ocaxê Osmanîyan ameyî awankerdiş û eke ameyoxe de hêrişê keye û cayê karî yê kurdan bibî, berpirsîyarê ci Erdogan bi xo yo’ û wina dewam kerd: “Sewbîna zaf rêxistinê îlegalî yê cîyayî zî estî. Erdoganî seba ke hêrişê kurdan bikerî talîmat dayo nê rêxistinê çeteyan. Eke mabênê kurd û tirkan de yew şer bivejîyo berpirsîyar Erdogan bi xo yo. Ganî şarê ma tedbîrê xo bigiro. Reyna ganî şarê ma rêxistine, pawitiş û yewîya xo awan bikero.” 

Seba Tirkîya do felaket bîyaro

Okî derheqê Rayberê Şarê Kurdî Abdullah Ocalanî de zî wina va: “Rayber Apoyî seba ke problemê kurdan bi hawayo demokratîk çareser bibo, zaf kede da. Heme wext û enerjîya xo seba nêyî xerc kerd. Hukmatê AKPyî seba ke nêyî sey zeyîfî dî, polîtîkayê şerî de hende israr kerd û ewro seferberîye îlan kerd. Seba ke zaf kewtî tengasî, cok ra seferberîye îlan kenî. Erdogan tim babeta îdamî ano rojeve û no çîyo ke veng nîyo. Wazenî komelî seba îdamî amade bikerî. Nika yeno famkerdiş ke MHP û AKPyî Rayber Apo û kurdan ser ra pêkerdî. Çend rojî verê yew mekteb de domanî destê înan de kendîlê îdamî reyde fotograf antî; no çîyêko ecêb o û berpirsîyarê ci Erdogan o. Ma zî hişyar kenî eke çîyêko winasî bibo seba Tirkîya do felaket bîyaro. Merdim ancax bi xoverdayîş eşkeno vera faşîzmî de bivindero. Ma bawer kenî bi azadîya Rayber Apoyî Kurdistan zî azade bena. Ganî ma sewbîna çîk nêfikirî.”

Rûsya û Tirkîya Bab û Helebî ser ra pêkerdo

Okî qiseykerdişê xo de ard ziwan ke ‘Heleb zerrîya Sûrîye yo û Şamo dîyin o’ û wina va: “Şam hetê sîyasî de, Heleb zî hetê ekonomîye de zaf muhîm o. Bi piştîdayîşê Rûsya û Îranî û bi xoverdayîşê YPG û YPJyî zafaneyê çeteyanê Nusrayî Helebî ra pak bîyî. Bi hawayo zelal yeno dîyayîş ke Tirkîya û Rûsya Bab û Heleb ser ra pêkerdî. Goreyê ma ganî Rûsya hende tavîzkar nêbîyêne. Reyna eke Tirkîya şîna hende rehetî bikewo mîyanê Cerablusî, semedo ke Amerîka û Rûsya vengê xo nêvetî. Hêrişê Tirkîya yê Bab de zî nê semedî ra yo. Eke wina nêbîyêne çeteyê DAIŞî senî wexto ke Mûsil û Reqa de hende bin hêrişanê giranan de bî û şînayî Palmîra dagir bikerî. Nêyî de rolê dewleta Tirkîya esto û ganî Rûsya zî na raştîye bivîna.”

Ganî merdim tarîxî ra ders bigîro

Okî qiseykerdişê xo de bale ant ser reaksîyonê Amerîka û yê Ewropa û wina va: “Vera nê hêrişan de reaksîyonê Ewropa û Amerîka bisînor, tersok û bi hawayo oportunîstî yo. Ganî her kes tarîxî ra biewnîyo û tarîxî ra ders bigîro. Hîtler senî bî Hîtler, dîktatorîyê faşîst yê Mussolînî û Francoyî senî aver şîyî. Yê ke nê dîktatorîyan rê rayîr akerdî, menfîetê o wextî bî. Raşt o, Tirkîya endamê NATO ya û cayêko stratejîk de ya, Erdogan zî nêyî zêde zêde xebetnena. Eke vernîya nê dîktatorî nêro girewtiş, tena seba kurdan nê, do seba şarê Rojhelato Mîyanên û heme merdimîye bibo bela. Ganî Ewropa nêyî qebul nêkera.” 



Do bibo belayê dinya

Okî qiseykerdişê xo de bale ant ser reaksîyonê Amerîka û yê Ewropa û wina va: “Vera nê hêrişan de reaksîyonê Ewropa û Amerîka bisînor, tersok û bi hawayo oportunîstî yo. 

Ganî her kes tarîxî ra biewnîyo û tarîxî ra ders bigîro. Hîtler senî bî Hîtler, dîktatorîyê faşîst yê Mussolînî û Francoyî senî aver şîyî. Yê ke nê dîktatorîyan rê rayîr akerdî, menfîetê o wextî bî. Raşt o, Tirkîya endamê NATO ya û cayêko stratejîk de ya, Erdogan zî nêyî zêde zêde xebetnena. Eke vernîya nê dîktatorî nêro girewtiş, tena seba kurdan nê, do seba şarê Rojhelato Mîyanên û heme merdimîye bibo bela. Ganî Ewropa nêyî qebul nêkera.” 



ANF / BRUKSEL