Gerîlayê Hêzê Pawitişî yê Kurdistanî yê Rojhelatî (YRK) Dewran Kirmaşanî derheqê erdlerzo ke Rojhelat û Başûrê Kurdistanî de bîyî de qisey kerd û seba piştîdayîşêyewbînanî veng da.
Kirmaşanî seba keyeyê ke endamê înan erdlerz de merdî serweşî waşt û wina dewam kerd: “Çapemenîya Îranî derheqê hûmara merde û birîndaran de raşt nevana. Ma koyanê Kurdistanî ra her tewir rewşa şarê xo ra xeberdar benî. Kirmanşan de krîzêko cîddî esto. Lazimîya mexduran bi hetkarîye esta. Werd û şimitişê şarî çin î. Nika cereyan zî çin o. Rejîmê Îranî hetkarîyêka taye dana Kirmanşanî.”
Gerîla Kirmaşanî dewamê qiseykerdişê xo de bale ant zîyaretê Serekkomarê Îranî yê Kirmanşanî ser û wina va: “Ruhanî seba propagandaya dewlete şî Kirmanşan. Eke raştî zî seba destekî bişîyêne, o wext do hetkarîye bidayêne. Şar nika şert û mercanê zehmetinan de cuya xo domneno. Wa şar nê polîtîkayanê cîyakaran bivîno û xo vîra nêkero. Wa şar grûbe û komîteyanê xo awan bikero. Şarê bajarnê bînan seba Kirmanşanî hetkarîye erşawitî, labelê rejîmê Îranî nêverdano biresî şarî.”
Wa ti kes bêveng nêmano
Gerîla Kirmaşanî peynîya qiseykerdişê xo de wina va: “Rejîmê îranî yewna rey sîyasetê xo yo dirî nîşan da. Hukmatê Îranî wextê şerî de şarê Kirmanşanî ‘şarêko bişeref’ bi name keno. Labelê rewşêka winasî de qet wayîr nêvejîyeno. Îran vano ‘wa kurdî bimirî, heqê kurdan yê cuyayîşî çin o’. Ez veng dana herkesî wa seba Kirmanşanî hesas bibî û bêveng nêmanî.”
ROJNEWS/KIRMANŞAN