Çapemenî rê ferman
Walîyîye 31’ê gulane de otelêkî de bi xebatkarê çapemenîya mîyanneteweyî û çapemenîya herêmkî kombîyayîşêkî viraşt. Walîyê Dîlokî Alî Yerlîkaya, Şaredarê Şaristanê Girdî ya Dîlokî Fatma Şahîn, Mudirê Emnîyetê Dîlokî Erhan Gulveren, Fermandarê Alayê Cendirmeyan a Dîlokî Albay Şeref Çamak, Serdozgerê Komarî Abdullah Bayir, Rektorê Zanîngeha Dîlokî Prof. Dr. Yavuz Coşkun, Serekê Heyetê Rayberî ya Odeyê Sanayî ya Dîlokî Adil Konukogul, Serekê Heyetê Rayberî ya Odeyê Bazirganîye Eyup Bartik û şaredarê qezayan beşdarê kombîyayîşî bîyî.
Kombîyayîşo ke rayberîyê îdarî, mulkî yê şaristanî, rayberîyê herêmî û sazîyê çapemenîye beşdar bîyî ewil sey kombîyayîşêko normal ame dîyîş. La badê ke kombîyayîş dest pê kerd û qalîkerdişê Walî Yerlîkaya de vejya werte ke no kombîyayîş, kombîyayîşêko normal nîyo. Çimkî walîyîya ke ganî dijî DAIŞe têkoşîn bido, seba ke xeberî derheqê DAIŞe de nêrî viraştiş, talîmat da çapemenîye.
Walî îtiraf kerd
Walî Yerlîkaya rojnamegeran ra waşt ke wa rojnamegerî fek pîvanê rojnamegerîye ra vera bidî û dîyar kerd ke heta ke derheqê hedîseyê ke şaristanî de biqewimyî de walîyîye îzehet nêdo, wa xeberî nêrî weşênayîş û wina vat: “Hêrişê DAIŞe de vatişê Dîlokî wa nêro xebetnayîş û herinda Balafirgehê Dîlokî ya herêmê nizdîya balafirgehî ya zî herinda sînorê Dîlokî, sînorê Karkamişî bêro xebetnayîş.”
Walî Yerlîkaya kombîyayîşî de xebatkarê çapemenîye ra waşt ke wexto ke derheqê DAIŞe de xeberî ameyî viraştiş, heta ke walîyîye tesdîq nêkero wa nêrî weşênayîş. Walîyîye no semedî ra gruba whatsapî (bernameya sohbetî) awan kerd û rojnamegeran ra waşt ke vernîya ke xeberanê xo biweşênî, bierzî ser whatsapî û badê ke walîyîye kontrol kerdî ra dima xeberî wa bêrî weşênayîş.
DÎHA/DÎLOK