Hemşaredarê Bêgirî Yilmaz Şalan û hemşaredarê Qelqelî Dîlan Orencî û Yakup Almaç ameyî tepiştene. Hemşaredarê Elbakî Erkan Acar û Hemşaredara Bêgirî Leyla Balkan zî bi şertê kotrolê edlîyî ameyî veradayene.
Hemşaredarê Wanî yê ke ameybî destbendkerdene 3ê înan ameyî tepiştene, 2ê ci zî bi şertê kontrolê edlîyî ameyî veradayene. Hemşaredarê Rêya Armûşê Azîm Yazcan o ke wezîfeyê xo ra ame girewtene û ame tepiştene hucreya yewkesîye de yeno tepiştene. Yazcan hawaleyê qesawetî ravêrna. Hemşaredarê Pasûrî Mehmet Fatîh Taş û Fatma Ay yê ke wezîfe ra ameyî girewtene û ameyî tepiştene ewro do roniştişê dewaya înan o verên bêro kerdene.
3 hemşaredar ameyî tepiştene
6ê kanûne de polîsan eştbi keyeyanê hemşaredaranê qezaya Bêgirî, Qelqelîye û Elbakî yê Wanî ser û 5 hemşaredarê HDPyî bi îdîaya ‘’endamîya rêxistine’’ û ‘’propagandaya rêxistine’’ destbend kerdîbî. Înan ra 3 hemşaredarî ameyî tepiştene.
Hemşaredarê ke 6ê kanûne de Wan de sereştişê keyeyan de ameyî destbendkerdene înan ra Hemşaredarê Bêgirî Yilmaz Şalan û hemşaredarê Qelqelî Dîlan Orencî û Yakup Almaç ameyî tepiştene. Hemşaredarê Elbakî Erkan Acar û Hemşaredara Bêgirî Leyla Balkan zî bi şertê kotrolê edlîyî ameyî veradayene. Hemşaredarê ke ameyî tepiştene ameyî berdene bi Zindanê Tîpê Tyî yê Wanî.
Hemşaredar Azîm yazcan hucreya yewkesîye de yo
Hemşaredarê Rêya Armûşê Azîm Yazcan o ke hetê qeyûmî ra wezîfeyê ci amebi xespkerdene 8ê teşrîna peyêne de amebi destbendkerdene û 11ê teşrîna peyêne de zî amebi tepiştene. Yacan reya verêne Zindanê Wanî de mendêne û dima ame berdene bi Zindanê Erziromî.
Yazcan Erzirom de hîrê rojî hucre de mend û dima ame erşawitene koxuşê yewkesîye. Yacan muracatê zindanî kerd ke koxuş ra bêro vetene la muracatê ci ameyî redkerdene. Yacano ke zindan de hawaleyê qesawetî ravêrna ci rê televîzyon, rojname û kitabî nênê dayene.
Cinîya Azîm Yacanî Hatîce Yacan vizêr şîye pêvînayîş. Yacane îfade kerd ke 2 hewteyan ra nata nêno destûrdayene ke mêrdeyê ci çew bivîno û vat:
“Mêrdeyê mi çend rojan ra nata nan nêweno. Vizêr vat ganî avûkatê ci cade ey zîyaret bikerê. Seba ke koxuşê tepişteyanê sîyasîyan de bimano zaf muracatî kerdî la pêro ameyî redkerdene. Ganî no kerdişê înan biqedo. Eşkera ya ke wazenê ma û hemşaredar zehmet biancê. Bi caardişanê zindanî wazenê ke ma ecîz bikê.”
Roniştişo dewaya hemşaredaranê Pasûrî ewro yo
Hemşaredarê Pasûrî Mehmet Fatîh Taş û Fatma Ay yê ke wezîfe ra ameyî girewtene û ameyî tepiştene siba do roniştişê dewaya înan o verên bêro kerdene.
Hemşaredarê Pasûrî Mehmet Fatîh Taş û Fatma Ay, Mudirê Karanê Fenî Şener Aktaş, Hemserekê HDPyî yê Pasûrî Abidîn Karaman, Mehmet Emîn Ay, endamê Meclîsê Şaredarîya Pasûrî Yucel Çete û operatorê Kepçe Umît Fîdan yê ke çerçeweya tahqîqatê teqayîşê qezaya Pasûrî ya Amedî de ameybî tepiştene siba do roniştişê dewaya înan o verên Mehkemaya Cezaya Girane ya 9. a Amedî de bêro viraştene.
WAN/AMED