Vera tecrîdî de çalakîyê grevê vêşanîye dewam kenî. Bajaranê Amed, Stenbol û Ewropa de xeylê bajaran de çalakîyê destekdayîşê çalakwananê grevê vêşanîye ameyî viraştene. Çalakîyan de ame waştene ke wa waştişê çalakwanan bica bêro û tecrîd wedarîyo.
Vera tecrîdê serê Rayberê Şarê Kurdî Abdullah Ocalanî de çalakîyê grevê vêşanîye dewam kenî. Parlamentera HDPyî Leyla Guvene 187 rojî yo, Nasir Yagiz 174, hepsîyê ke zîndanan de yî 149, Îmam Şîş û 14 çalakwanê Strasbourgî 148, Yûsûf Îba 122 û Fadîle Toke zî 114 rojî yo ke grevê vêşanî de yî.
Hepsîyê ke zîndanan de dest bi grevê vêşanîye kerdbî, înan ra 2 grûbê ke 15 kesan ra pê yenî rojeyê mergî de yî. Çalakîya grevê vêşanîye ya parlamenteranê HDPyî zî awanîya HDPyî de dewam kena.
Sere de Ewropa û xeylê cayanê bînan de çalakîyê ke seba piştîdayîşê grevê vêşanîye yenî kerdene dewam kenî. Bajarê Amedî de qezayanê Peyas, Sûr, Yenîşehîr û Rezanî de seba ke destek bidî çalakwananê grevê vêşanîye, çalakîya rayîrraşîyayîşî ameye viraştene. Cinîyan serkêşîya çalakîyan kerd û çalakîyan de siloganê ‘ma do bi xoverdayîşî serbikewî’, ‘Leyla Guvene rûmetê ma ya’ û sewbîna ameyî eştene. Kesê dormeyî zî bi çepik û tîlîlîyan destek da çalakwanan.
Stenbol de zî tecrîd ame şermezarkerdene
Stenbol de vizêr zî hetê merdimanê tepişteyan ra çalakîyî ameyî viraştene. Xeylê kesî beşdarê çalakîyê ke qezayanê Bakirkoy, Sancaktepe, Esenyurt û Başakşehîrî de ameyî viraştene bîyî. Bakirkoy de bi çalakîya roniştişî û rayraşîyayîşêk tecrîd ame şermezarkedene û bale ancîya serê rewşa xoverdayoxanê grevê vêşanîye û rojeyê mergî ser. Derûdor ra zî hemwelatijan bi siloganê ‘Wa biciwîyo xoverdayîşê zîndanan’ paştî daye çalakîye. Reyna bi heman waştişî Sancaktepe, Esenyurt û Başakşehîr de zî merdimê tepişteyan meydanan de bî. Çalakwanan ard ziwan ke waştişê xoverdayoxanê grevê vêşanîye waştişê înan ê û waşt ke cade bêrê bicaardene.
Xeylê cayanê Ewropa de çalakîyî virazîyayî
Ewropa de sere de Awusturya, Îtalya, Fransa û sewbîna tayê cayanê bînan de zî kurdîstanijî vejîyayî raşteyan û destek da çalakwananê grevê vêşanîye. Kurdistanijî wareyê Herrengasseyî yê bajarê Grazî yê Awusturya de ameyî têhet, seba wayîrvejîyayîşê rojeyê mergî û grevê vêşanîye çalakîyêk û mîtîngêk viraşt. Mîtîng de fotografê Ocalanî, alayê PYD, YPG û YPJyî ameyî akerdene. Çalakîye de xeylî vilawekî ameyî vilakerdene.
AMED