Belçîka ra avûkatê endamê Buroyê Huqûqî yê Progress Lawyers Networkî yê ke dewayanê sîyasetmadaranê Kurdan û macîran teqîp kene, şîyî xoverdayoxanê Strasbourgî yê ke 130 rojî yo semede wedartişê tecrîdê serê Rayberê Şarê Kurdî Abdulah Ocalanî grevê vêşanîye de yê ser de.
Avûkatan tayî xoverdayoxan de pêvînayîşêko kilm viraşt û derheqê halê înan de zanayîş girewt. Ame vatene ke xoverdayoxî biqerar ê ke heta wedartişê tecrîdî çalakîya xo bidomnî û avûkatan ra ame waştene ke Konseyê Ewropa (KE) û Komîteya Vernîgirewtişê Îşkenceyî (CPT) dir pêvînayîşan virazê û waştişê çalakwanan bidê eşnawitene.
Avukatan bi eşkerayîyêk bale ante ke tecrîd nêno qebulkerdene. Avûkatan ra Joke Callewaertî vist vîrî ke mehkemaya Belçîka faalîyetê PKKyî rê vato teror nêyo û PKK û Tirkîya sey rêxistinê biçekî name kerdî.
‘Wa wezîfeyê xo bica bîyarê’
Avûkatan ra Selma Benkhelifa zî arde ziwan ke ê paştî danê mucadeleyê kurdan û wina va: “Waştişê xoverdayoxan biheq o, meşrû yo. Kam beno wa bibo heqê heme tepişteyan esto ke avûkat û merdimanê xo reyde pêvînayîş bikero. Ganî CPT zî nê waştişî qebul bikero. Hêzê CPTyî esto şiro Erdogan û Tirkîya ser? Ma naye nêzanê? Ma do derheqê waştişê grevê vêşanîye de CPTyî rê mektubek bierşawê. CPT verê cû zî şibi Îmrali. Nika no tewirê înan nêno famkerdene. Ma do înan ra vajê ke ‘waştişê xoverdayoxan biheq û meşrû yo, rixmê naye qey şima ra heta nika reaksîyonêk çin o‘ û înan ra biwazê ke wa wezîfeyê xo bica bîyarê.”
ANF / STRASBOURG