AYDIN ATAY / MA / AMED
Bi nameyê Fehîme Eteya ke 2006 de seba Rayberê Şarê Kurdî Abdullah Ocalanî waştişname dayo û ê waştişnameyan vila kerdo, serrêk 8 aşmî cezaya zîndanî girewtbî. Qerar Yargitay de ameybî tesdîqkerdene û Ete na ceza ver serrêk 2 aşmî zîndan de mende û seba ke sewbîna dosya ra verê cû zîndan de mendbî, tehlîye bîye.
Avûkata Ete Reyhan Yalçindage na ceza kirişte Mehkemeya Heqê Merdiman ya Ewropa. Mehkemeya Heqê Merdiman ya Ewropa (MHME) na ceza ser o qerarê xo da û dîyar kerd ke vatişê ‘Abdullah Ocalan îradeyê min o sîyasî yo’ çarçewaya azadîya fikrî de yo. MHME Tirkîya mehkum kerd û qerar da ke wa Tirkîya 2 Hezar 500 Euro tazmînat bido Ete. Reyna MHME seba mesrefê mehkemekerdişî zî 780 Euro bido.