Dersim de endamê Platformê Cenîyan yê Dersim ver bana PTT de are bî û seba tepişteyanê cenî rê qertî rusnay. Dima ra kuçeyê Senatî de amey têlewe û mesajê ‘Dest mede îrade, beden û emegê mi’ day.
Cenîyan kuçeyan de bi tenekeyan veng vetî û sloganî eştî.
Platformî ra Nûrten Yeşîl ke nûmayiş de qisey kerd vist vîrî ke dûştê cenîyan şîdetê camêrdan rameno. Yeşîl ard zon ke aşmanê sifte yê 2016î de bi desan cenî amey kişten û vist vîrî ke hikûmeta AKP dûştê şîdetê cenîyan ser o de tekoşîn nêkena, eksê ci komelê ke paşt danê cenîyan mor kena, padîyena.
Kuçeyan terk nîkenime
Endama Platformê Cenîyan yê Dersim Nûrten Yeşîl aşkere kerd ke bi behaneyê derbeya Seray û OHALî kuçe û meydanî cenîyan ra yenê girotiş. Yeşîl herzewbîn da zonayen ke bi derbeya Serayî sîyasetmedarî, nuştoxî, akademîsyenî, sendîqavanî, cenîyê ke tekoşîn kenê yenê tepiştiş û bi nayî wazîyeno çimê cenîyan bîrê tersnayiş. Nûrten Yeşîl peynî aşkere kerd ke zey cenî ê seba ke wayîrê azadîya îfade û rêxistinbîyayişê xo, seba ke wayîrê kuçeyan bivejyê are bîye.
Nûmayiş bi tilîlî û sloganan qedîya.
Vizêr herzewbîn cayanê zey Amed, Mêrdîn, Şirnex, Agirî, Qers, Stenbol, Mersîn û Edene de zî cenî vejyay meydanan û dûştê şîdetî mesajê xoverdayişî day. Teberê welatî de zî cenîyê Kurd bi cenîyanê netewanê bînî ra pîya meydanan de bî.
DERSIM