11ê Îlonê de hikûmeta AKP qeyûm tayînê 24 şaredariyanê DBP kerd û dest nay îradeyê şarî ro. Verra nayî nêrazîbîyenî ramenê. 11 hemşaredarê ke qeyûm tayînê şaredariyanê înan kerdî nêrazîbîyenê xo ardî ziwan û veng day şarî.
‘Qeyûm sebebê lejî yo’
Hemşaredara Êlihê Gulistan Akel diyar kerd ke qeyûm sebebê lejî yo. Akel da zonayen ke qeyûm dûştê îradeyê cenî û yê şarî yo. Bi zihnîyetê camêrdî şaredarîyan îşgal kerdî. Akel aşkere kerd ke iyê dê bi şarî ra pîya dûştê nayî de tekoşîn bikerê.
Hemşaredarê Qelqelî Cafer Seven zî vist vîrî ke hikûmet bi tîmanê taybet dormeyê şaredarîyan giroto. Sevenî veng da şarî ke dûştê nayî de bivejyê meydanan. Hemşaredara Artemêtan Nurhayat Çelik zî ard ziman ke ê dê goreyê waştenanê şarî hereket bikerê. Çelik vist vîrî ke welatanê demokratîk de weçînayoxî bi weçînayişî yenê û şinê û va: “Eke xo ra bawer kenê wa bîrê ma weçînayişî virazê. Şaredariyê ma yê ke ma bidê qeyûmî çinî yê. Ma bi emelê quwetê şarê xo kenê.”
‘Şar no zilmî qebûl nêkeno’
Wekîla Hemşaredaranê Erdîşê Guler Avci zî ard ziwan ke jew personelê înan zî do nêşiro kar û şar do na zilmî qebûl nêkero. Avci va na şaredarî yê şarî ya û do her daîm yê şarî bo. Hemşaredara Qulpê Neşegul Can zî da zonayen ke ê qeyûmî nêsilasnenê û dê nêşirê ser karî. Can veng da şarî ke dûştê na nêheqî vengê xo berz bikerê, şaredarîyanê xo ver de are bibê.
Hemşaredarê Xweşxeberê Halis Taşdemîr zî vist vîrî ke îradeyê şarî ameyo xespkerdiş û aşkere kerd ke iyê dê dûştê na nêheqî û zilmî têkoşîna xo dewam bikerê. Hemşaredarê Dihê Îdris Yildirimî zî da zonayen ke dûştê na nêheqî iyê dê bi şarî ra pîya tekoşîna xo dewam bikerê û hetê hiqûqî de zî wayrê heqê xo bivejyê.
‘Şaredarî keyeyê ma yê’
Hemşaredarê Kopê Arafat Kardagî zî da zonayen ke nêrazîbîyenê şarî berz o û va ma qet na zilmî qebûl nêkenê û dê bi şarî ra pîya tekoşîna xo berz bikerê. Kardagî veng da şarî ke tewrê nûmayişanê ewro bibê.
Wekîla Hemşaredaranê Farqînê Zuhal Tekiner zî vist vîrî ke ê ser wezîfeyê xo de yê û şarî mîyan de yê. Tekiner vist vîrî ke şaredarî keyeyê şarî yê û va, şar keyeyê xo qeyûman rê nêverdano.” Wekîlê Hemşaredaranê Pirsûsê Halîl Akbaşî zî aşkere kerd ke iyê dê ewro dûştê qerarê qeyûmî bi şarî ra pîya çormeyê şaredarîya xo de bibê xelek. Akbaşî va ma qeyûman nêsilasnenê û veng da şarî ke wayrê şaredarîyanê xo bivejyo. Hemşaredara Şemrexê Necla Yildirim zî da zonayen ke şaredarîyê înan hetê quwetanê dewlet ameyê îşgalkerden. Yildirim hayr ant rolê tekoşînî ser û va: “Ma xover da, ma dê xover bidê. Ma bi weçîntayişan amey, ma dê bi weçîntayişan şirê.”
DÎHA / NAVENDÊ XEBERAN