Dewleta tirk 25ê Nîsane, seat 02:00 de, bi 26 teyareyanê şerî Şengal û herêma Qereçox yê Rojawa bombevaran kerd. Netîceyê hêrîşî de 20 YPGyijan ra pîya, kesêko sivîl û 5 peşmergeyî şehît kewtî û bi desan kesî zî bî dirbetin. Hêrîş xêlê welatanê Awrûpa de protesto bî. Nûmayişan de sloganê “Terorîst Erdogan”, “Biciwe xoverdayîşê Rojawa” berz bî. Herzewbîn rîwalê pîyakarîya bi AKP ra, PDK zî ame îqaz kerden.
Kurdê ke sûka Swîsre Zurîh de ciwîyenê bi mitîngeke hêrîşan protesto kerdî. Bi seyan kesê ke ver Meclîsê Zurîhî de amey têhet Rathausbrucke de mitîngeke viraştî. Qiseyan de vera hêrîşan mesajê berzkerdişê xoverdayîşî amê dayen. Herzewbîn sloganê “Biciwe xoverdayîşê Rojawa”, “Biciwe xoverdayîşê Şengal” amey berzkerdiş.
Sloganê “Terorîst Erdogan” berz bî
Kurdistanijê ke sûka Norveç Oslo de ciwîyenê zî ser vengdayîşê KCDK-E ver îstasyonê trenî de amey têhet û bi mitîngeke hêrîşan protesto kerdî. Nûmayişî de sloganê “Terorîst Erdogan” berz bî.
Paytexta Danîmarka Kopenhag de zî Kurdistanijan îstasyonê tren Hovedbanegården de, bi damûstayîneke çapemenî hêrîşan rê nêrazîbîyayîş damûsna. Paytexta Avûstûrya Vîyana de zî hetê Platformê Nê yê Avûstûrya û Merkezê Civaka Demokratîk ver Parlamentoyê Avûstûrya de damûstayînê çapemenî ame dayen. Damûstayîn de xîleyanê referandûmî ra pîya, hêrîşanê hewayî yê AKP rê nêrazîbîyayîş damûsnîya.
‘Şengal û Rojawa tenya nîyê’
Kurdê ke sûka Hollanda Den Haag de ciwîyenê ser vengdayîşê Dem-Ned’î ver Dîwana Edalet yê Lahey de are bî, AKP rê nêrazîbîyayîş damûsnay. Qiseyan de vajîya ke Şengal û Rojawa tenya nîyê. Arhem de zî nûmayîşê protestoyî merkezê sûk de virazîya û mesajê dewamkerdişê nûmayîşan ame dayen. Vera hêrîşan jew nûmayîş zî sûka Îtalya Torîno de virazîya. Kurdê ke tewrê nûmayîşê xelesnayîşê Îtalya bî de hayr antî hêrîşanê dewleta Tirk ser. Herzewbîn Mîlano de zî Kurdan nûmayîşê Îtalyayanan ra eynî mesajan day.
Pîyakarîya Almanya ya bi AKP ra
Bi desan sûkanê Almanya de zî Kurdistanijan meydanan de hêrîşan lanet kerdî. Kurdê ke sûka Dresden û çormeyê ci de ciwîyenê merkezê sûk Altmarktgallerî de mitîngeke viraştî. Kurdistanijan welatanê Ewrûpa ra waştî ke hemverê hêrîşan bêveng nêmanê. Sîegen de bi tewrbîyayîşê seyan kesan hêrîşî protesto bî. Sûka Saarbrucken de zî mitîngeke protestoyî virazîya. Qiseyan de vajîya ke hêrîşî netîceyê îtîfaqê AKP-MHP de virazîyayê. Herzewbîn bêvengîya dewletanê Ewrûpa rê zî nêrazîbîyayîş damûsnîya.
“Merkel fînanse kena”
Sûka gird yê Almanya ra Hambûrg de zî hêrîşê AKP ver îstasyonê tren de protesto bî. Qiseyan de vajîya ke hêrîşan ra Serokê PDK Mesût Barzanî zî mesûl o. Anja Flach ke ser nameyê Meclîsê Cinîyan yê Rojbîn qisey kerd veng da dewleta Almanya ke desince lejkerê Alman yê Încîrlîk peyser bianco û hemverê Tirkîye tewr damûsno. Nûmayîşê protestoyî yê Bremen ver Parlamentoyê Eyalet de virazîya. Êzidî, Alman, komanê antî-faşîst ra pîya xêlê kes tewrê nûmayîşî bî.
Herzewbîn sûkanê bîn yê Almanya, Berlîn, Frankfûrt, Hannover, Koln, Stûttgart, Pforzheim, Dortmund, Essen, Freîburg, Dusseldorf, Darmstadt û xêlê cayan de nûmayîşê protestoyî virazîyay. Herzewbîn Paytewta Îngilîstan London, Paytexta Fransa Parîs de zî şar meydanan de bî. Nûmayîşan de sloganê “Terorîst Tirkîye”, “Kiştox Erdogan” amey berzkerdiş. Herzewbîn bi parkartanê zey “Merkel fînanse kena, Erdogan bombevaran keno” pîyakarîya Almanya û AKP rê nêrazîbîyayîş damûsnîya.
NAVENDÊ XEBERAN