Taxê Alîpaşa û Lalebeyî yê qezaya Sûrî ya Amedî ke girîyaybî çarçeweya îstîmlaqî, 9 rojî yo ke nê taxan de rijnayîş dest pêkerdo. 9 rojî yo ke awe û cereyanê şarê taxe ameyî birnayîş. DBP û HDP seba Sûrî kombîyayîşêk viraşt û seba Sûrî qerarê çalakîye girewtî. Qerar de awankerdişê platformî ame girewtiş û platform do qerarê xo ewro aşkere bikero.Babete ser o Endama Platformê Pawitişî yê Sûrîçî û Hemsereka DBPyî ya qezaya Sûrî ya Amedî Ayhan Dogruale qisey kerde.
Dogruale va ‘hem ez û hem zî domanê mi Sûr de pîl bîyî’ û wina dewam kerde: “Tayê taxê ke binê abluqa de yî, ewja de rijnayîş esto. 4 taxê ke nika qedexekerde yî ra çîyêk nêmendo. Keyeyê mi zî ewja de bî. Nika keyeyê mi ra çîyêk nêmendo. Ewro wazenî taxanê tîya zî birijnî. Wazenî OHALî sey mehne nîşan bidî û taxan seba rantî biakerî, labelê ma do vera rantî de bivinderî. Eke çîyêko winasî bibo, o wext do bingeyê tarîxî yê taxan bêro xirakerdiş. Ma do nêyî qebul nêkerî.”
Do çîyêk nêmano
Dogruale dewamê qiseykerdişê xo de va ‘şarê ma bi rojan o vera rijnayîşî de têkoşîn dano û ma zî do heta peynî hetê şarê xo de bibî’ û wina domnaye: “Ma zanî ke mîyanê rijnayîşî de engîşta parlamenteranê AKPyî esta. Bi no hawa hewl danî cayêko tarîxî çinî bikerî. Bi rijnayîşê taxe hewl danî Sûrî ra çîyêk nêverdî. Sereyê înan de fikrê înan de ‘ma prosesê OHALî de çiqas bîşêrî, hende kar o’ esto. Ma do destûr nêdî nînan û ma do heta peynî pey şarê xo de bibî. Ma veng danî her kesî ke wa wayîrê Sûrî bivejyî.”
Ma do gird bikerî
Dogruale dîyar kerde ke ‘tîya de bi seyan kesê ke keyeyê xo nêdanî estî û heme zî yenî mexdurkerdiş’ û wina va: “Nika seba ke înan eciz bikerî, awe û cereyanê înan birnenî. Merdimî bi rojan o ke tîya de xover danî. Şar nêwazeno ke fek Sûr ra verado û şêro TOKÎyan de bimano. Kesê ke keyeyê xo nêdanî, koçkerdiş ser înan de yeno ferzkerdiş. Merdimî cayê xo ra memnun î û nêwazenî biteriknî. Ma zî do heta peynî hetê şarê Sûr û xoverdakaran de bibî. Yê ke Sûr de rantî nêwazenî, ganî vera rijnayîşî de bivejyî û hêrsê xo nîşan bidî.”
ŞÛJIN/AMED