Wendekarê Unîversîte Kemal Kurkut Newroza Amedî de hetê polîsan ra amebî qetilkerdiş û polîsê ke Kurkutî qetil kerdbî ameybî tepiştiş û dima ra serbest amebî veradayîş. Tewr peynî zî derheqê hedîseyî de qedexeyê weşanî amebî girewtiş. Hemsereka Komeleya Heqê Merdiman (ÎHD) Avûkate Eren Keskîne babete ser o qisey kerde.
Keskîne va ‘qetilkerdişê Kurkutî bi hawayo aşkere înfaz o’ û qiseykerdişê xo wina domnaye: “Herinda ke qatilî bêrî tewqîfkerdiş, serbest veradîyenî û no zî nîşan dano ke wexto ke kerdox dewlete ba, qatilî senî yenî pawitiş. Înfazêko winasî wexto ke Îzmîr û Stenbol de bêro cuyayîş bi hawayêko cîya ser o yeno vindetiş, labelê wexto ke Amed de beno sewbîna hawa ser o yeno vindetiş. Ganî qetilbîyayîşê Kurkutî ver her hetan ra veng bivejîyayêne, labelê kêmî bî. Vera qetilkerdişanê winasîyan de îtîrazî çiqas kêmî bibî, cezanêkerdişê dewlete zî hende meşrû beno. No zî beno sedem ke dewlete kerdişanê xo ver nêro mehkemekerdiş.”
Ma do taqîp bikerî
Keskîne dewamê qiseykerdişê xo de va ‘cezanêkerdiş polîtîkayêka dewlete ya’ û wina dewam kerde: “Derheqê doze de qerarê nimiteyî ame girewtiş û no zî seba pawitiş û nimitişê înfazî yo. Sewbîna hedîseyan de zî wina ameybî kerdiş. Seba ke medya ameya bêvengkerdiş, no hîna bi hawayo rehet yeno kerdiş. Aqilêko xirab yê dewlete esto, çimkî wextê hedîseyî de cilê Kurkutî piradaye nêbî. Eke orte de kardîyêk esta, o wext ganî bêro kiştiş? Gule cayê ke tehlukeyê mergî estî ginayo û no zî nîşan dano ke qestê cînayetî esto. Ma do sey Komeleya Heqê Merdiman na doze heta peynî taqîp bikerî.”
ZEYNEP KURAY / ANF / STENBOL