Rojnameger Nedîm Turfent qezaya Geverî ya Colemêrgî de xeylê xeberî viraştbî û nê xeberan ver nizdîyê 2 serrî yo tewqîfkerde yo. Bitaybetî dîmenê ke 50 karkerê bi hawayo kelepçekerde erdî ra amebî dergkerdiş û ser sereyê înan de ‘şima do hêzê tirkan bivînî’ ameyêne vatiş, hetê Turfentî ra pêşkêşê raya pêroyî amebî kerdiş û demêko derg rojeva Tirkîya de mendbî. Turfent wexto ke tepişîya, demêk ci ra xebere nêameye girewtiş. Badê ke rojnamegeran derheqê Turfentî de kampanya dayî destpêkerdiş û parlamenterî kewtî dewre, ame vatiş ke Turfent Gever de yo. Turfent 13ê Gulane de tewqîf bi û ame vatiş ke 22 şahidî ey ser o îfade dayî. Labelê dima ra nê şahidan ra zafê ci aşkere kerdî ke ê şert û mercê îşkenceyî de îfade dayî û Turfentî ra ozrê xo waştî. Mehkeme 7 serrî ceza daye Turfentî û dima ra na cezaye vete 8 serrî 9 aşmî. Babete ser o Verfekê Înîsîyatîfê Rojnamegeranê Azadan (OGÎ) Hakki Boltanî wina va: “Na doze zaf muhîm a û ganî hertim bêro vîrê ma. Çira Turfentî tehlîye nêkerdî? Nêyî zî nîşanê ma da ke dozgerî, emnîyet û mehkeme bi hawayo ortax hereket kenî. Ma nê qerarî qebul nêkenî. Ma do hertim seba çapemenîya azade bixebetyî.” Doze bîya doza heyfgirewtişî Derhênerê Pêroyî yê Rojnameyê Evrenselî Fatîh Polatî zî va ‘doza Turfentî bîya doza heyfgirewtişî’ û wina domna: “Turfentî donemêko zehmetin de şert û mercê zehmetinan mîyan de seba şarî rojnamegerî kerd. Badê ke xebera ‘şima do hêzê tirkan bivînî’ olan daye, zaf şîyî ey ser de. Xora mehkemeya yewine de dî ke kesê ke sey şahidi ameybî nîşandayîş, îşkenceyêko senîn ra derbaz bibî.” MA/WAN