Hemsereka Şaredarîya Qezaya Licê ya Amedî Rezan Zugurlîye derheqê hêrişê ke Licê de benî va qezaya Licê de hêrişê sîstematîkî estî û wazenî bi destê qoricî û leşkeran qeza veng bikerî.
Hêrişê sîstematîkî ke serranê 90î ra nata vera Licê de benî, ewro reyna hewayo veşnayîşê dewan, cakerdişê leşker û qoricîyan, tehdîtkerdişê dewijan û polîtîkayê asîmîlasyon û qoricîkerdişî reyna dewre de yî.
Nika zî tim û tim bi qedexeyê tebervejîyayîşê kuçeyan û bombekerdişê dewan şar yeno cezakerdiş û raştê îşkence yeno. Tewr peynî 17 teşrîna verên de hîrêgoşeyê Licê, Karaz û Hezro de 14 dewan de qedexe amebî îlankerdiş û nê dewan ra 10ê ci yê Licê bî. Qedexe ra dima dewan de şewat vejîyabî. Babete ser o Hemsereka Şaredarîya Qezaya Licê ya Amedî Rezan Zugurlîye qisey kerd.
Kewtiş û vejîyayîşê dewan yenî astengkerdiş
Zugurlîye va ‘wazenî Licê bêmerdim veradîy’ û qiseykerdişê xo wina domna: “Wazenî şîyîşê şarî yê keyeyanê xo û domnayîşê cuya xo asteng bikerî. Warê cuyayîşî yê şarî yenî qetilkerdiş. Çîyo ke serranê 90î de bi destê JÎTEM, Hîzbullah û Kontrgerîlla ameyêne kerdiş, ewro wazenî bi destê leşker, polîs û qoricîyan bikerî. Polîtîkayê DAIŞî dewre de yî. Şarê ma nînan rê xerîb nîyo û zano ka çi cuyeno.”
Çîyo ke leşkeran kerdêne, qorîcîyî kenî
Rezane dewamê qiseyanê xo de va her çiqas ke rez, bexçe û keyeyê şarî ameyî veşnayîş zî şarî warê xo nêteriknayo û va: “Demo verên de leşkeran rayîran girewtêne û kontrol kerdêne. La nika eynî karî qoricîyî kenî. Kesê ke wazenî şêrê dewanê xo hetê qoricîyan ra yenî astengkerdiş. Çend rojî verê ekîbê ma yê îtfaîye waştî şêrî, şewatî bitafênê, hetê qoricîyan ra tepa ameye açarnayîş. Reyna qoricîyan daybî xebatkarê TEDAŞî û muxtarê ma ro. Qoricîyî nê heqan kura ra gênî? Wa baş bizanî ke şarê ma vera înan de sere nêroneno.”
Ma destûr nêdanî ke ê ma bikerî dişmenê yewbînan
Zugurlîye peynîya qiseykerdişê xo de hayr ant polîtîkaya pêverardişê pê yê dewlet ser û va: “Ewro kesê ke benî qoricî, însanê ma yê ke ameyî asîmîlekerdiş î. Wazenî ma bikerî dişmenê yewbînan û ma yewbînan ra bidî çinkerdiş. Eynî dewe de hem qoricîyî û hem zî şarê ma yo welatperwer cuyeno. Ma do sey kesê ke ameyî weçînayîş, destûr nêdî qirkerdişan. Ma do hetê şarê xo de bibî.”
AMED / BERÎTAN CANOZER / JINHA