Qezaya Sûrî ya Amedî ke 1 serrî ra zêde yo ke tede qedexeya tebervejîyayîşê kuçeyan dom keno de Şaredarîya DBPyî yê Sûrî rê Bîlal Ozkan 30ê teşrîna peyêne de hawayo qayûm amebî tayînkerdiş. Îcraato sifteyîn yê Ozkanî karî ra vetişê 67 xebatkaranê şaredarî bî. Tayînkerdişî ra dima Bîlal Ozkan odeya xo ra dest pêkerd û camê ke gule ti ra nêvîyareno pa kerd. Reyna berê serekîye rê berêko bîn ame zêdekerdiş û asansoran de sîstemê bikart ame viraştiş. Heto bîn ra çîyanê sifteyînan yê qayûmî ra yewe zî betalkerdişê Mudurîya Polîtîkayanê Cinîyan û karî ra dûrîvistişê cinîyê xebatkaran bî. Qayûmî 3 aşmî yo ke seba şarî ti xizmet nêkerdo. Sûr de karkerê ke ÎŞ-KUR de xebetîyayêne, karê înan peynî bîyo û wexto ke karkerî yenî girewtiş û bitaybetî cinîyan ra yeno vatiş ke ‘bêrê ma ziqaqanê Sûrî de şima rê sîleh bidî û bibê qorîcî.”
O wext wa dezgeyanê cinîyan nêpadî
Babete ser o cinîya bi nameyê Z.Tye qisey kerde û va ‘ez Sûr de ciwîyena û nika ra 1 aşme verê ez ÎŞ-KUR de kewta kar’ û qiseykerdişê xo wina domnaye: “Badê ke karkerî şaredarîye ra ameyî dûrîvistiş, bi telefon ma gêrayî. Bi taybetî cinîyê ke Sûrî ra vejîyaye seba ke bibî qorîcî, înan rê teklîf kerdî. Ma ra vatî ‘ma şima rê kar dîyo’ û waştî ke ma qoricîtî qebul bikerî. Ti kesî nêyî qebul nêkerd, la tîya de yê ke lazimîya ci karî rê estî, zaf î û wazenî ma bi vêşanî terbîye bikerî. Wazenî ke ma vera cîrananê xo de ajanî bikerî. Eke wazenî cinîyan rê kar biveynî o wext wa dezgeyê cinîyan nêpadî.”
ŞÛJIN / AMED