Weçînayîşê wekîlanê 7ê hezîrane de, yew edalet çin o. Çunku yew het ra, se ra 10 bendê weçînayîşî est o. Qanûnê nê bendê weçînayîşî, wextê Kenan Ewrenî de awan bîyo. Ina (wina) hewa yew bendê weçînayîşî, ez texmên kena ke, dinya de yewna dewlete de çin o. No bendê weçînayîşî, seba ke wekîlê kurdan nêdekewê Meclîsî Tirkîya, awan bîyo. Serdestê Tirkîya, heme wext vanê; “Ma birayê yewnan î.” Ewta de huqûqê birayey çin o. Serdestê Tirkîya, heme wext, behsê demokrasî kenê. La ewta de demokrasi çin o. Ewta de yew heq û edalet zî çin o.
Mîyanê partîyan de zî bêedaletey est a. Mesela goreyê Qanûnê Butçe, partîyê ke sey ra 10 bendê weçînayîşî ra vêrenê, ardimê Xeznaya Dewlete ra îstîfade kenê. Serranê 2005î ra ver, partîya ke, 10 wekîlan ra vêşêr wekîlî vetnê û rêxistinîya teşkîlatê xo temam kerdnê, xezna ra ardim girewtnê. 2014 de no qanûn bedilîya. Goreyê nê qanûnî paretîya ke se ra 3 rayan bigêro ardimê xezna ra îstîfade kerdnê. Tewr peynî de, wexto ke butçeya serra 2015’î hedre bîya, no qanûn newe ra ame bedilnayîş.
Bi heme îmkananê dewlete weçînayîş nêvêro
Goreyê nê qanûnî, partîya ke se ra 7 rayan bigêro, ardimê xezna ra îstîfade kena. Bi çerçeweyê pakêta Demokrasî de, partîyê sîyasîya ke se ra 3 rayan bigêrê, ardimê xezna ra îstîfade kenê. HDP sey ra 6.57 weçînayoxan temsil kena la no ardim ra îstîfade nêkena. Partîyanê kurdan, hetan eyro xezna ra ardim nêgirewto. Serra 2015î de; AKP 297 mîlyon Lîra, CHP 155 mîlyon Lira, MHP 78 mîlyon Lîra Xeznaya Tirkîya ra ardim gêna. Tirkîya de 52 mîlyon û 806 hezar û 322 weçînayoxî estê. Yekun 531 mîlyon lira nê partîyan rê ardim beno. Sereyê weçînayoxî 10.05 lîra konê (kuwenê). Kurdî û demokrat û mûxalîfê Tirkîya zî bac danê la partîya ke kurdan, demokratan û mûxalîfanê Tirkîya temsil kena, hetan eyro, ardimê Xezna ra îstîfade nêkerdo. Yewna het ra serekkomar Recep Tayîp Erdogan û serekwezîr Ahmet Davutoglû û hukmatê înan, bi heme îmkananê dewlete, semedo ke HDP bendê weçînayîş nêvêro; meydan-meydan, mîtîng-mîtîng geyrenê û vera HDP propoganda kenê. Serekkomar Recep Tayîp Erdogan; goreyê Qanûnê Bingeyî ganî bêteraf bimendnî. Yew het ra heme îmkananê dewlete karano, yew het ra Quranê Kerîmî û dînê îslamî şuxulneno. HDPyan se bêdîn îlan keno. 25’ê sibata 2008î de Mella Mûhîtîn Eryilmazî, meşê DTP de, semedo ke operasyonê nêbê, veynda (vengda) serekwezîr Tayyîp Erdoganî da û vat ke; “Birêz Erdogan, qaydê xatirê nê Qûranî, na gonî biedilne.”
Hemverê bêedaletiye bêveng nêman
Ay wext, medyaya îqtîdarî, no mella se provokator, se mûxbîrê îngîlîzan îlan kerd. Polîsan no mella tewîşt (tepîşt) û dekerd zindan. Mella Mûhîttînî 22 aşmî û duyes (diwês) rojî cezaya hepsî pawita. Goreyê ma Mella Mûhîttînî, esla yew suc nêkerdo. Qûranî, seba menfaetê xo, seba propagandaya sîyasî nêşuxulnayo. Seba ke gonîya ciwanan billa (vila) nêbo, bi zerrîya safî Qûran hewanayo. Derûdorê AKP, adeta Mella Mûhîttînî, bêpawitiş mehkum kerd.
La nê merdiman serekkomar Erdogan rê çepikan danê piro. Semedo ke AKP serbikewo û HDP binê bendê weçînayîşî bimano; bi teyaraya dewlete, bi walîyan û qeymeqman û Ordûyê Tirkîya û heme sazîyanê dewlete adeta seferber bîyê û propagandaya AKP kenê. Butçe ra, holdîngan ra, karsazan ra ardim gênê, bes nîyo, butçeya pêroyî ra bêusûl û bêqanûnî, peranê milete, propagandaya xo ya sîyasî rê xerc kenê. Ewta de, hem serokkomar Tayyîp Erdogan, Serekwezîr Ahmet Davutoglû û hukmatê înan herbî bêedaletey kenê. Pekî dabanê AKP, na bêedaletey senêhewa qebul kenê? Goreyo ke ma zanê, ganî merdimo musliman, bi edalet bo, tabîî bêedalet nêbo. Vera bêedaletîye bêveng nêmano. Serekwezîr Erdoganê û Ahmet Davutoglû, bi no têgeyr û bi nê uslûbê xo heme hewa ra vînî (vîndî) kenê.
No têgeyr û no ûslûb de xeyr çin o. Serekwezîr Erdogan û Ahmet Davutoglû û hukmatê xo HDP tehdit kenê. Binê aba ra zope nawnenê. HDP se partîyêka terorîste name kenê. Tayê merdimî nê vatişanê serekkomar Erdoganî û serekwezîr Ahmet Davutoglûyî ra xo rê yew wezfe vejênî hêrişê (gala) HDP kenê. Hem Edene de û hem zî Mersîn de, her roj wexto ke û odeyo ke namzetê HDP tede xebata weçînayîşî organize kenê, nê odeyan de bombeyê dayê teqnayîş. Nê merdiman waştnê ke, Edene de û Mersîn de, tam yew qetlîam bikê.
Goreyê vatişan, no merdimo ke bombeyî, vistê bîneyanê HDP ser, birayê ey DAIŞî (IŞÎDî) mîyan ca girewto. No merdim zaf ray şîyo Sûrîye û ameyo. Heme kes zano ke, hukmatê AKP, DAIŞî rê ardim kena. Hetta ajanê dewleta Tirkîya, DAIŞî mîyan de ameyê tewiştiş (tepiştiş). Ewta de bi tesaduf yew hêriş nêbîyo.
Hetan eyro bi desan hêrişê HDP bîyî. Nê hêrişan de, çekî, bombeyî ameyê vistiş, lincî bîyê, bêraqî ameyê veşanayîş. Raşta ey hima zî gumanê ma esto ke, ko tayê provokasyonî bibê. Hukmat verê ganê verî fek nê ziwanê xo yo wişk ra verrado. Yew qala ma ê verênan est a vanê ke; “Kê çi biancê, kê ziwanê xo ra ancenê.” Erdogan vano ke; “Meseleya kurdan çin a. Maseyê dîyalogî çin o.”
Wezîr Yalçin Akdogan zî bi Projeyê Aşîtî şantaj keno û vano ke; “Eke HDP bendê weçînayîşê wêro, prosese aşîtî zî qedîno.” bêsamîmîyetîya Erdoganê û yê hukmatê AKP hedîseyê Roboskî de vejîyaya orte.
MAMOSTE SILÊMAN
HDP bendê vêrena û dekewena Meclîsê Tirkîya
Eyro sîyasetê îmha û înkarî îflas kerdo. Hewje keno ke, semedo ke no weçînayîş, bêqeza û bêbela vêro; cêr ra cor, heme kes ganî bi persîyarî têbigeyro. Şar wazeno ke sandiq de, bi azad îradeyê xo vejî orte. Heme partî no weçînayîş de, wa xo rehet îfade bikî û wa sîyasetê xo bidî famkerdiş. Eke vernîya HDP de manî (asteng) nêvirazîyo; HDP asaney reyde bendê weçînayîşî vêrena û dekewena Meclîsê Tirkîya. Yew het ra, bi bendê weçînayîşî, yew bêedaletey virazîyaya. Yewna het ra propagandaya weçînayîşî de yew bêedaletey est a. Şarê Tirkîya, eke bi rayanê xo, na bêedaletey sandiq de hewano zaf rind beno.