Partiyanê siyasî serva-qandê weçînayişanê 7’ê Hezîran lîsteyê azayan aşkere kerdî. Tercîxê partiyan herzewbîn polîtîkayanê înan zî damisnenê. Pêrokîn çimî ser HDP de yê. Çi ke HDP aktorê weçînayişano. Netîceyê weçînayişan dê qederê tirkiye bivûrnê. Çi ke winî ayseno ke HDP bendawê weçînayişî ravêrnena û zey partî kewna meclîs. Wextê viraştişê lîsteyê azayan de pêrokîn renganê Kurdistan û Tirkiye HDP tercîx kerdî. Lîsteyê HDP zey meclîsê temsîlkaranê şaran o. Zerreyê ci de Kurd, Tirk, Ermenî, Süryanî, Romen, Çerkez, Laz, Caferî, Alewî, Misilman, Êzidî, Xirîstiyan û hzb. pêrokîn şarî û îtiqatî estê.
Herzewbîn kişta ceniyan de zî HDP îmtihanê xo rind da. Lîsteyê HDP de nîmeyê azayan cenî yê. No çî tarixê komarê Tirkiye de çiyê do sifte yo. Xeyrê HDP partiyanê bînî zî lîsteyê xo de ca day çend azayanê cenî. Bi sayê HDP rengê siyasetê Tirkiye vurniyena. Heta nika siyaset zey karê camêrdan hesibniya û pêrokîn kursiyê meclîsê Tirkiye de camêrdî roniştî. Bado ke HDP ispat kerd ke cenî zî şenê siyaset bikerê, meclîs de homara parlamenteranê cenî bena vêşî. Heta bîn ra tercîxê çormeyanê sosyalîst, femînîst, ekolojîst, emekdaran zî HDP yo.
Partiyê bînî de teva nêvûrniya, zey fikrê verî lîsteyê xo kerdî hadre. Lîsteyê AKP de kesê ke nezdiyê Erdoğan’î yê bî azay. Çi ke Erdoğan wazenê sîstemê ‘serokwezîrtî’ rono, cok ra kesê ke ci ra veng nêvejerê tercîx kerdinîy. CHP zî cayo ke lîsteyê xo goreyê hewcedariyê şaran virazo, tenya goreyê serkewtişê weçînayinî viraşt.
Endî muxalefeta raşt yê Tirkiye HDP ya. HDP do çiçî rê muxalefet bikero? Do qanûnanê herbî ra muxalefet bikero. Do qanûnê ke tenya goreyê menfaatanê jû homet, jû îtiqat jû kamî, jû cînsî ameyê hadre kerdin rê muxalefet bikero û vajo ser nê hardî de zaf îtiqatî û şarî estê. HDP do bibo vengê ceniyan, gencan, emegdaran û do bibo vengê pêrokîn çormeyê ke heta nika nêamey hesibnayen. Va yê HDP açarniyeno firtone. Lîsteyê HDP serva şaran omidê gird la serva partiyanê bîn tersê do gird akerd. Çi ke şarî û îtiqatê ke dewlet heta nika qir kerd dê bikewê meclîs. Herzewbîn Roboskî ra zî azayê HDP esto. Dewlet do dîroka xo ya tarî ra, do raştiyan ra rî bi rî bimano. Cok ra tersê do gird kewto pîzeyê Erdoğan’î û sermiyananê bîn yê dewlet.
HDP zerreyê meclîs de bo, ya zî teberê ci de bo zî omidê gird yê şaran o. Alternatîfê Tirkiye tenya HDP yo. Çi ke tenya HDP serva heqanê însanan tekoşîn dano. Cok ra gune na qorî herkes herwextî ra hin vêşi seferber bibo û bigurwo. Endî hurendiya dewlet û siyaseta corîn de, ma bi xo tercîxê xo ronê û îdareyê xo ebi xo weçînê. Dewrê siyaseta corîn ke şaran xo rê kena kole qediya. Dewr endî yê şaran o, dewrê HDP yo.