Vizêr Vakûrê Kurdistan de bimbarekîna tewr gird yê Newroz Amed de viraziya. Se hezaran kesê ke Meydanê Newroz de are bî, waştena serbestiya Rayverê xo qîr kerdî û xoverdayişê xoseriya Kurdistan selamî kerdî.
Bimbarekîna ke hetê HDP, DBP, KCD, KJA û DEM-GENÇ î bi slogana ‘Rayberîya azad, Kurdistana xoser, Tirkiyeya demokratîk’ û ’Bi xoverdayiş serkewnime’ viraziya de se hezaran Kurdistanijî are bî. Meydanê bimbarekîn de posterê Rayverê Şarê Kurd Abdullah Ocalan’î ra piya, xêlê al û posterî va day. Bimbarekîn bi kurmancî, soranî û kirmançkî, Newroz çar leteyê Kurdistan rê bimbarek bî. 770 temsîlkaranê siyasî, sazgehanê sivîl ra piya, malbatê ke gede (doman) yê xo xoverdayişê Sûrî de kerdî vinî zî tewrê nûmayişê Newroz bî.
Raya muzakere akerê
Badê wendenê ‘Ey Reqîp’ bernameyê Newroz destpa kerd. Ser nameyê Komîteyê Hadreyîn Hafîze Îpek qiseyê akerden kerd û vist vîrî ke kurdî dê heta çilka goniya xo ya peynî tekoşîna xo dewam bikerê. Peycoy Hemşaredarê Sûka Pîl yê Amed Gultan Kişanak û Firat Anlî vejyay ser sehne û bi kurdî şarî silamî kerdî. Hemşaredaran vera zilmê hukumdaran hayr antî xoverdayişê şaran ser. Parlamenterê HDP Sirri Sureyya Onder ke xîtabê şarî kerd vengê çarekerdiş da hukumet. Onder’î waştena destpa kerdişê muzakereyan kerd û va raya Îmrali akerê, ma çi soz da yo se ma dê biyarê ca. Onder’î hayr ant xoverdayişê Sûr, Cizîr, Şirnex û cayanê bîn ser û no xoverdayişî selamî kerd.
Malbatê ke xoverdayişê Sûr de domanê xo kerdî vinî zî vejyay ser sehne û veng day sermiyanan ke cenazeyê domananê xo bigîrê. Aşkerekerdişê malbatan de hayr anciya ablûqeyê vera Sûr ser û vajiya ke jew herbo bê name yeno ramiten. Aşkere kerdiş de vajiya ke, Jûyîna Awrûpa, Mîletê Jûbiyayî, AIHM û pêrokîn sazgehê Awrûpayî pêrokîn qetlîam û êrişê vera kurdan temaşe kerdî. Malbatan vatî, cenazeyê domananê ma se metre dûrê ma de yê la ma nêşkenê bigîrê û veng day sermiyanan ke cenazeyan teslîmê înan bikerê.
Demîrtaş: Ma xoverdayiş ra hadre yê
Hemserokê HDP Selahattîn Demîrtaş’î zî Newroza Amedî ra xîtabê bi mîlyonan kerd û da zonayen ke ma serva çarekerdişê demokratîk ra hadre yê. Demîrtaş’î va, eke çarekerdin nêbo, ma serva xoverdayiş zî hadre yê û da zonayen ke, înan pêrokîn cayanê xoverdayiş yê Kurdistanî ra serva Ocalan’î mektûb ruşnayo Îmrali. Demîrtaşî hayr ant bimbarekînê hîrê serranê peynî yê Newroz ser û wina va: “3 serranê Newrozî de ma mijdaniya haştî da. La ewro ma bin sersiya kiştiş û merdişan de Newroz bimbarek kenê. Hîrê serran de ma va haştî xeyal niya.”
‘Mesaja Amed raşt biwanê’
Selahattîn Demîrtaş’î da zonayen ke şarê Kurd bê tarîx û bê kok niyo û qiseyê xo wina ramite: “Kok û tarîxeke ma yê xorîn esto. Zey tekoşîna Kawa, riho têkoşîna ke ma keno jew esto. Ewro domanê Botan, Mîr Bedirxan, Şêx Seîd, ma selamî kenê. Senî ke alwozê Seyîd Riza Dêrsim de, tornê Qazi Muhammed Mahabad de, tornê Mele Mistefa, Alî Şer û Zarifeyan senî ke ma rê mîras ternayo, ma zî mesajê Arîn Mîrkan ê Kobanê, Mehmet Tunç ê Cizîr û Sêvê yê Sîlopya ma ra verday, kenê mektûb û rişenê Serok Apo rê. Ma hetkarê herb û pirodayişan niyê, hetkarê haştî çarekerdiş û demokrasî yê.
Hemserokê HDP Selahattîn Demîrtaş’î vist vîrî ke bi rayê antî-demokratîk û hiqûqî nêşkenê bîrê pêhet û va yê ke ma anê pêhet rayê demokrasî û hiqûqî yê. Demîrtaş’î da zonayen ke Rojhelatê Miyanî de tarîx yeno nuşnayen û wina va: “Winî ayseno ke aqilê Enqera kêm o û şaş o. Şarê Kurd nêterseno û wazeno ke bi erjayenê xo bicuwyo. Şarê Amed fina mesaja tarîxî da. Bi seyaseta qedînayen, çinkerdiş û înkarî çarekerdiş nêbeno. Yê ke ser kurdan û Rojawa gorê menfeatanê xo siyaset kenê dê vinî bikerê.
Demîrtaş’î waşt ke na pêvaco ra dersê rindî bîrê vetiş û wina va: “Xoverdayiş do heta serkewtiş biramo. Wa ewro herkes rind bizano ke şarê kurd ewro serva xorînkerdişê herb tekoşîn nêkeno, serva heqanê xo yê demokratîk herb keno. Felsefeyê ma de ageyrayiş çinyo. Tarîx de ma ti wext sare wenêdart û ma dê vera zilm sare çewt nêkerê. Newroza Amedî reye de bîn damusna ke çarekerdişê demokratîk de israreke esto”. Demîrtaşî peynî de hayr ant mîsyonê HDP ser û va, HDP serva çarekerdişê demokratîk yê şaranê kurd û tirk ameya ronayen.
Azadî nezdî yo
Ser nameyê KJA Sebahat Tûncel qisey kerd û va, azadî nezdî yo, tecrîd do wedariyo û Kurdistan do azad bo. Tûncel da zonayen ke Newroz roja xoverdayiş a û wina va:”Vera zilm ma dê zey Mazlûman, zey Rahşanan xover bidê. Zey Cizîr, Sûr, Nisêbîn ma dê xover bide. Tekoşînê Arîn Mîrkan vilayê her cayê Kurdistan bi.” Tûncel da zonayen ke azadî nezdî ya. Ma dê şarê Kurdistan azad bikerê û va, tecrîd do wedariyo û Kurdistan do bireso azadiya xo. Tepişteyanê siyasî zî bi jû mesaj xoverdayişê xorayirberdişan selamî kerd.
Bimbarekîn de xêlê hunermendê namedar yê zey ‘Mîkaîl Aslan, Koma Gulê Xerzan, Koroyê Ceniyan yê Ş.Mizgîn, Orkestraya Muzîk yê Amed zî sehne girotî.
NAVENDÊ XEBERAN
Rojawa de vayê Newroz
Rojawayê Kurdistan de kila adirê Newroz kantonanê Kobanê Cizîr û Efrîn de berz bî. Bimbarekînê Rojawa ke bi slogana “Rojawa ya Azad ra hetê sîstemê federal a demokratîk’ viraziya de, xoverdayişê Vakûrê welat selamî bi.
Miştenûr de kila adirî
Bimbarekînê Newroz yê Kobanê ser tepeyê Miştenûr de viraziya. Doman, genc, kal, pîr û ceniyê ke kincê neteweyî kerdî xo, seatanê sodir ra verê xo day hetê tepeyê Miştenûr. Badê geyrayişê qûwetanê asayîş bi hezaran kes dekewtî meydanê bimbarekîn. Meydanî de panqarta “Rojawa ya Azad ra hetê sîstemê federal a demokratîk’ ra piya resîmê Rayverê Şarê Kurd Abdûllah Ocalan û alê YPG, YPJ aliqiyay. Herzewbîn sloganê zey ‘Bicuw Serok Apo’ berz bî.
Badê vinderdişê hurmet meşaleyî wekerdiyay û Koma Navendê Kulturî yê Baqî Qido vejyay ser sehne. Herzewbîn Koma Zarokan û Koroyê Şehît Arîn kî bimbarekîn de sehne girotî. Mesajê ke amey dayen de xoverdayişê Vakûr silamî bi.
Cizîr ra heta Efrîn…
Kantona bîn ya Cizîr de zî xêlê cayan de Newroz bimbarek bî. Sûkanê Dêrik, Girkê Legê, Tirbespiyê, Qamişlo, Amudê, Dirbêsiyê, Serêkaniyê, Til Temir û Hesekê de zî Newroz bi slogana “Rojawa ya Azad ra hetê sîstemê federal a demokratîk’ û ‘Azadiya Rayver Apo, azadiya şaran a’ bimbarek bî. Bimbarekîn de sloganê zey ‘Şarê Cizîr, Nisêbîn, Amed, Sûr tenya niyo’ berz bî.
Kantona Efrîn de bimbarekînê Newroz dewa Avraz ya girêdayî qezaya Mabeta de viraziya. Welatijê ke zereyê sûk û qezayanê Şera, Şiyê, Raco, Cindrêsê, Mabeta, Şêrawa û Bilibilê de cuwyenê seatanê sodir ra verê xo day Mabeta. Bimbarekîna tiya de zî qerarê sîstemê konfederalîzm yê Sûriye û xoverdayişê xorayirberdişê Vakûr silamî bi. Herzewbîn bi slogan û mesajan serbestiya Rayverê Şarê Kurd Abdullah Ocalan waziya.
Taxa Helep Şêxmeqsûd ke kurdî cuwyenê û bin êrişanê SUK û ENKS de danê xover de zî Newroz bimbarek bî. Qûwetanê YPG û YPJ yê ke mewziyan de yê Newroz bimbarek kerdî û mesajê xoverdayiş day.
ANHA/KOBANÊ
Qendîl ra mesajê jûbiyayen
Hardê Pawitenê Medya de Newroz bi tewr biyena hezaran kesan bimbarek bî. Bimbarekîna ke hetê Tevgera Azadî organîze bî de xoverdayişê pêrokîn leteyanê Kurdistan rê selamî ruşiyay.
Badê wendenê Çerxa Şoreşî adirê Newroz wekerdiya. Hemseroka Tevgera Azadî Şîlan Şakir vejya ser sehne û derheqê Newroz de qisey kerd. Herzewbîn Hunermendê zey Ozlem Baglayan, Casim Saz û Koma Penaber zî sehne girot.
Hemserokîna KCK zî Newroz’a Qendîl rê mesaj rûşna. KCK veng da şarê Başûrê Kurdistan ke serva ke Başûrê Kurdistan de sîstemekê çarekerdinê demoktarîk roniyo tekoşîna xo berz bikerê. KCK Newrozê şarê Vakûrê Kurdistan zî bimbarek kerd û seva ke Cizîr, Sûr, Sîlopî, Hezex, Şirnex, Nisêbîn Gever peyser gam nîeşt înan selamî kerd. KCK vist vîrî ke krîzo ke Vakûr û Başûr de yeno cuwyayen encex bi tekoşîn êşkeno hal bibo. Peyniya mesaja xo de KCK çar leteyan rê mesajê jûbiyayen da.
Mexmûr de gerîlayan adir wekerd
Qampa penaberan ya Mexmûr de zî adirê Newroz hetê gerîlayanê HPG û YJA-Star wekerdiya. Gerîlayan ser tepeyanê tewr berz de adir wekerd û çormeyê ci de govend girotî. Gerîlayan aşkere kerdî ke adirê Newrozê emserr serva azadiya Kurdistan’î yo.
Herzewbîn zereyê qamp de zî bernameyê Newroz estbi. Bi hezaran ronişteyê qamp tewrê bernameyê bî û sloganê ‘Bicuw Serok Apo’ berz kerdî.
ROJNEWS/QENDÎL