Rojnameya Welat ke 1992 de dest pa weşana xo kerd û kişta damusnayîşê kurdî de bi mîsyona dibistanekê hereket kerd, her tim raştê zextanê dewlet amê. Tenya Welat nê, a demî ra na het pêrokîn weşanê ke Welat ra dima vejyay zî raştê enê zextan amey û yenê. Nê rojnameyan ra yewe zî Rojnameya Azadiya Welat ke 10. serra weşana xo de bi qerarê Qerarnameyê Hukmê Qanûnî (KHK) amê girotiş a. 

Azadiya Welat 15'ê Tebaxa 2006 de bi şîyara "Roj welat ra akewno" dest pa weşana xo kerd. Rojnameyî hetê rojnamegerîya kurdî de bi mîsyonê dibistanekî hereket kerd. Edîtoranê rojnameyî ardî ziwan ke, îyê dê rixmê pêrokîn zext û zorvajîyanê îxtîdarî zî na kevneşopî biramnê. 

Dûştê çapemenîye derbe 

Edîtoranê Azadiya Welat’î ra Zeynel Abîdîn Bûlût ke padayîşê rojnameyî ra dima Rojnameyê Rojeva Medya de dest pa karî kerd, da zonayen ke Azadiya Welat kişta vilabîyayîşê ziwanê kurdî de wayrê roleke gird bi. 

Bûlûtî vist vîrî ke Rojnameyê Azadiya Welat, Welat, Welatê Me ke raştê prosesanê zaf giran amey û xêlê gurekarê ci amey qetilkerdiş, tepiştiş, weşana xo ramitî, bêveng nêmendî. Rojnameger Bûlûtî aşkere kerd ke  Azadiya Welat tewr jêde zî dema îxtîdara AKP de raştê zextan amê, hetê dewlet bi qerarê kêfî amê girewtiş. Îxtîdarî dûştê çapemenîya azad derbe viraşt. 

‘Ma dê sereyê xo nimz nêkerê’ 

Zeynel Abîdîn Bûlûtî dîyar kerd ke înan soz dayo Apê Mûsayan, Rohat Aktaşan û ewro zî bi Rojeva Medya eynî kevneşopî ramenê û wina va:  "Rojname bi eynî performans, rol, mîsyon û polîtîka weşana xo dano ramiten. Îxtîdar seba berdewamîya xo, polîtîkayanê çin kerdişê erjayanê kurdan ferz keno. Wazenê şarê kurd bêveng bikero. Ma dê dûştê hêrîş û kerdenanê vera rojnameya ma û çapemenîya azad sereyê xo nimz nêkerê. Ma dê rêça Apê Mûsayan, Rohat Aktaşan û xêlê embazanê bînî de tim heqîqatî binuse. Qelemê înan dê erdî de nêmanê.” 

Kurmancî ra dima kirmanckî

Edîtorê beşa kirmancî yê Rojnameya Rojeva Medya Emrah Kelekçîer’î zî hayr ant zextanê dewlet yê vera rojnameyê kurdî ser û da zonayen ke rixmê pêrokîn hêrîşanê giran rojnameyî bi nameyanê cîya weşana xo domnay. Kelekçîer’î vist vîrî wextê verîn yê weşana rojname de tenya bi lehçeya kurmancî weşan ame kerdiş û hina va: “La serranê peynî de bi lehçeya kirmanckî de zî weşanî destpa kerd. Bi nayî ra her ke şino mîyanokê rojnameyî beno dewlemend. Na rêçî de bi seyan embazî rastê kerdenanê giran yê dewlet amey û hewro zî nê kerdişî hona dewam kenê.”

Emrah Kelekçîer’î da zonayen ke Rojnameyê Welat ra heta Azadiya Welat û Rojeva Medya, nê rojnameyan kişta ziwanî de bi hezaran kesan resnay, perwerde kerdî. Kelekçîer’î aşkere kerd ke na kevneşopî roja ewil ra na het bê ke rêça heqîqetî ca verdo, ramena û va, ‘beno ke nameyê ci yenê vûrnayiş, la weşan bi eynî xet û mîyanokî ramena.’ 

Kelekçîer’î tewr peynî de aşkere kerd ke hetê weşangerîya kurdî de rol û mîsyono ke kewno ser milê înan çi beno wa bibo, dê her tim şarî roşnî bikerê û goreyê kevneşopîya çapemenîya azad hereket bikerê.  


 AMED