Ekolojist Yanliç vat ke zozan û yabanan de keyeyan bi melzameyê xocayî virazyayê, no ser zî erdlerz de her tim ser piyan mende û dewan rê bajaran koçî rê pey şar hîna zaf erdlerzan rê zirar dîyê.
LÊL AMED / AMED
Taybetî îqtîdarbîyayişê AKPî ra pey ekolojîya Tirkîye her ke şî xîrap bî, çimkî AKP zey vatişê Rayberê Şarê Kurd Abdullah Ocalanî zey ke partîyêka heyfî ya, hêrişê ekolojîya Tirkîya û Kurdistanî kerd. Kurdistan de çiqas daristan estê ameyê veşnayiş, bi bendawan tebîetê Kurdistanî bedilya, Heskef ame talankerdiş. Babete ser o ekolojist Guner Yanliç rojnameyê ma rê qise kerd.
Ekolojist Guner Yanliç vat ke taybetî serrê peynî pêroyina dinya de virazyayişê erdlerzan zêdîyayê, ceribnayişê çekanê nukleerî, gêrayişê gazê zinarî, ocaxê madenî viraştişê erdlerzan rê bîyê sebep, rojê ameyoxî de do hîna erdlerzanê gird bibê.
Bi polîtîkayê îmarî tebîat wêran kerdê
Ekolojîst Yanliç aşkera kerd ke mîyanê 300 serrî de tebîat bi polîtîkayê mêtingerî yeno wêrankerdiş, her çiqas sazîyê sivîl û rêxistinê îlmî babetê vetişê yaqitê fosîlî, wêrankerdişê daristanan, viraştişê bendawan û xebatê madenî de hîşyar bikê zî çi heyfo nîno verçimgirewitişî û wina vat: “Her kes zaneno ke Tirkîya de zaf hûmarî de fayê erdlerzî vîyarenê labelê îqtîdarê merkez û xocayî bi polîtîkayê îmarî tebîat wêran kerdê, polîtîkayê îmarî bi virazyayişê erdlerzan yenî rojdemî. Kapîtalîzm bi wêran û talankerdişê kultirê dewijîye çin kerdo û no ser zî dewan rê bajaran koç zêdîyayê, peynî zî projeyê îmarî ke bingeyê xo rantî ra gêno awan bî.”
Koçî rê pey şar zaf zirar dî
Yanliç dîyar kerd ke welatijî ke yaban de cuyenê eke ê zî erzlerzî rê zirar dîyê, no zî polîtîkayê banî yê şaşî rê qewimyenê û wina domna: “Bi hezar serran zozan û yaban de keyeyan bi melzameyê xocayî virazyayê, no ser zî erdlerz de her tim ser piyan mendê. Dewan rê bajaran koçî rê pey şar hîna zaf erdlerzan rê zirar dîyê.”
Yanliç bal ont peynîya Erdlerzê Wanî vatişê faşist û şovenîstî rê û wina qedîna: “Çi heyfo ke ma erdlerzê Xarpêtî de zî zey Wanî vatişê faşist û şovenîstî ra şahîd bîyê. Eke na rewşe dewam bika, seba ameyoxê Tirkîya telukeyêka gird esta. Ma encax eşkenê bi destekdayişê yewbînan qezenc bikê.”