Rayberîya Platformê Rojnamegeranê Cinîyan yê Mezopotamya de 23 û 24ê êlule de bi babeta ‘Cinîyî weşangêrîya cinîyan munaqeşe kenî’ kombîyayîşêk virazîya. Kombîyayîş salona kombîyayîşî ya sendîkaya SESî de virazîya û nizdîyê 60 rojnamegerê cinîyî beşdar bîyî.
Ajansê Jinnews, Ajansê Mezopotamya, E-Rojname, rojnameyê Yenî Yaşamî û sewbîna 7 dezgehanê bînan ra cinîyî beşdarê kombîyayîşî bîyî. Cinîyan 2 rojî weşangerîya cinîyan ser o munaqeşe kerd û seba donemo newe pêşnîyazê xo kerdî.
Bitaybetî mefhûmê ke xeberan de yenî şuxilnayene bîyî babeta kombîyayîşî û xusûsen mefhûmê îstîsmarê zayendî ser o ame vindetene. Reyna cinîyan şahidîya nê prosesî ser o zî vindetî. Kombîyayîş de ame vatene ke hêriş, qetlîyam û krîzê ekonomîke tewr zaf cinîyan ser o tesîr kenî û cinîyan bale ant bihêzkerdişê têkoşînî ser. Kombîyayîş 2 rojan ra dima qedîya.
AMED / JINNEWS