Komîteyê Rayverîn ê Partiya Karkeranê Kurdistan’î PKK bi jû damûsnayin 37. serraçarnayinê xo mubarek kerd. PKK eleqe ant kolonyalîzmînê dewleta tirk û siyasetê çinêkerdin û qirkerdinê serran ser û wina qalê şertanê werte vejiyayinê PKK kerd: PKK şertanê zehmet ê kolonyalîzmî de vejiyay sehneyê tarîx ser. PKK hertim rihê demî fehm kerd û xo newe kerd. PKK heme tekoşînê xo de, bi vengê xoverdayişê şarê xo û merdimîn.
Waştena rayverîna xoser
Komîteyî eleqe ant êrişanê çeteyanê DAIŞ ê bi destegê dewleta tirk jî ser û wina vat: Quwetê ke Kobanê de komkiştenî viraştî, nika Farqîn, Nisêbîn, Gever, Cizîra Botan, Sur û Licê de êrişê îradeyê şarî kenê. La belê şarê mayê xoverdayoxî heme hewldayenanê komkiştenan pûç vejeno û mewziyanê xoverdayişî hera kenê.
PKK vist vîrî ki vera heme îmkananê kemî û zehmetiyan, serkewtişê girdî vistê dest û wina vat: Sîstemo ke paştiya xo dayo camêrd, înkarî vera çinêbiyayinî şino. Hinî vengê azadîwazan bi quwet vejiyeno. Şarê mayo ke hesretê vînayinê Rayverê xo ya, zey ro û layan, heme astengiyan werte ra hewadeno û raya xo akeno. Sûkan û koyan ra şarê Kurd, bi waştena “rayverîna xoser” vera serkewetiş û weşîna azad şino ravey.
Rayverînê ceniyan
PKK eleqe ant rayverîna ceniyanê kurd û rolê gencan ser û wina dewam kerd: “Ceniya Kurdistanî bi rayverîna PKK de vera azadî şina ravey. Ceniya Kurd hendê Kurdistanî, serva-qandê ceniyanê dinyayî jî biya quwetê dînamîk. Ceniya kurd bi têkoşînê xoya zanayinê azadiyê cenî vet werte û îspat kerd ke, cenî garantiyê weşîna azad û demokratîk ê. Gencê Kurd zî dê bi qerardarî wezîfeyanê xo biyarê ca û şarê ma biresino azadî.
Wayrê xoverdayişî bivejyê
Komîteyê Rayverîn ê PKK damûsnayina xo de vist vîrî ke tekoşînê azadî her çihar hetanê Kurdistan’î de beno gird û wina peyniyê mesaja xo ard: “Ma serkewtinê hamleya Hol, Şengal û rayverînê xoser ê Bakurê Kurdistan’î mubarek kenê. Ma veng danê heme Kurdistanijan û raya pêroyin ke, tewrê xoverdayişê Kurdistanî bibê. Bi xoverdayişê pêroyina weşîna azad û demokratîk ron”e. Ma fina bîn roşanê xoverdayişê heme embazan, şarê ma, keyeyanê şehîdan, Rayver Apo û merdimey bimbarek kenê.
ANF/BEHDÎNAN
Xeta PKK serkewna
Derheq dê serragêra 37. yê PKK de, jû damûstayin zî Hemserokînê Konseyê Rayverîn ê KCK ra amê.
Konseyê Rayverîn ê KCK, serragêra ronayişê PKK bimbarek kerd û vist vîrî ki Rayverê Şarê Kurd Abullah Ocalan’î, şarê Kurd û şehîdanê azadî PKK resnayê rojanê ewroyî.
PKK ocaxê azadî yo
KCK va: Hereketo ke Newroz’ê 1973 de, bi 6 kesan dest kerd ci, ewro pêroyîn Rojhilatê Miyanî de biyo omidê şaran ê azadî, demokrasî û sosyalîzmî. Rayver Apo, Hereketê Azadiyê Kurd, açarna zey ocaxê azadiyê merdimîn. Bi eno wesîleya ma Rayver Apo selam kenê. Şexsê Hakî Karer, Mazlûm Dogan, Hayrî Dûrmûş, Kemal Pîr û Sakîna Cansiz de, heme şehîdan anê vîrî. KCK eleqe ant silogana Ocalan’î ya ‘Omid serkewtiş ra bi qîmetino’ ser û wina vat: Rayver Apo bi na siloganî û quwetê şarî vet werte. Vera îşgalkerdoxan xoverdayiş esas girot. Goreyê silogana xo hereket kerd. Rihê xoverdayişî vet werte. Bi ê rihî mûsna Kurdistanijan ke, şenê heq dê heme nêheqiyan û zehmetiyan ra bêrê.
Xeta Ocalan’î vinî nêkena
KCK ard ziwan ke tekoşînê 42 serrîn, îspat kerdo ke xeta Ocalan’î vinî nêkena û wina vat: Ewro jî xeta Rayver Apo û PKK, heme letanê Kurdistanî de xoverdayişê xo bena ravey. Şarê Kurd ra piya, mîjdana şoreşê demokratk dana heme şaranê Miyanê Rojhilatî.
KCK fina bîn dazonayen ke xeta Ocalan û PKK, do serkewtişî biyaro.