Westayê dêzan yê 60 serran yê Dêrsimî

Bi nameyê Halîl Bozkûrtî de keso ke 60 serrî yo ke qezaya Mazgêrdî ya Dêrsimî de dêzan virazeno, debara xo bi no hewa keno. Bozkûrt dîyar kerno ke ey nê meslegî westayêkê Armenî ra bander bîyo. Bozkûrt westayo peyên yê Dêrsimî yo.

Bozkûrt seba ke karê xo de aver şêro û sewbîna metodan zî bander bibo, Amerîka, Fransa û Îngilistan zî tede 12 welatan de gêrayo û çîyanê ke virazeno sere de bajaranê Tirkîya û xeylê cayanê dinya rê roşeno. Westa Bozkûrt vano ‘viraştişê dêzan Armenîyan ra yeno’ û wina domneno: “Verê cû merdiman mîyanê dêzan de werd viraştêne û çîyanê xo nimitêne. Hetê weşîye de zaf baş bi. Nika naylonî vejîyayî, nêweşîyî vila bîyî.”

Bozkûrtî qala viraştişê dêzan kerde û wina va: “Ez kişta Muzirî ra herra sûre ana û herra tebîî zî hetê koyan ra arê dana. Her tewir herre nêbena. Ez herra xo suzgeç ra vîyarnena. Dima ra seba ke amên bigîro, ez awe piro kena û seba ziwabîyayîşî vindena. Wexto ke ziwa bi, ez firine de germ kena û o wext êdî amade yo.”

Ez karê xo ra zaf hes kena

Bozkûrt dano zanayene ke vîyarte de 16 westayê dêzan estbîyî labelê nika o tena mendo û wina vano: “Ez etirîyena ke no mesleg çin bibo. Ez nêwazena ke no mesleg bimiro. Mi xeylê dezgehan ra vato, ez wazena derse bida domanan. Eke ciwanî bander bibî, hem mesleg hem zî hunerî bander benî. Berê ke her kesî rê akerde yo. Ez ge-ge hewnê xo de zî meslegê xo vînena. Ez meslegê xo ra zaf hes kena. Heta ke rî û çimê mi çamure nêbî, ez rehet nêbena. Ma herre ra ameyî û ma reyna şonî herre. Huzûrê mi herre yo.”