Hetkara Derhênerê Rojnameyê Agosî Karîn Karakaşliye derheqe referandûmî de veng da welatîyan û wina va: “Wext, wextê cîyabîyayîşî nîyo, wextê bi ziwan, reng û nîjadê xo nîşandayîşê têkoşîno ortax o”
Nê rojan de amadekarîya seba referandûmo ke do aşma nîsane de bêro viraştiş, yeno kerdiş. Heta nika partîyanê sîyasîyan ra heta rêxistinê cinîyan, ekolojîstan ra heta hetanê cîya-cîyayan yê komelî derheqê referandûmî de deklarasyonê xo aşkere kerdî.Babete ser o Hetkara Derhênerê Rojnameyê Agosî Karîn Karakaşliye qisey kerde.Karakaşliye va ‘referandûmî ra ver mîyanê komelî de cîyayîyêk ameyo awankerdiş’ û qiseykerdişê xo wina domnaye: “No hetê îqtîdarî ra bi hawayo zanaye yeno berzkerdiş. Ma cehenemo ke mabênê weçînayîşê 7ê hezîrane û 1ê teşrîna peyêne de qewimîyabî, cuyayî. Mekanîzmaya cezanêkerdişî tim qirkerdiş û qetlîyamanê neweyan rê rayîr akeno. Cok ra ez seba referandûm û rejîmo ke tede yew merdim qerarê heme çîyan dano ver etiryena.”
Wa wayîr bivejyî
Karakaşliye dewamê qiseykerdişê xo de sebebê vatişê ‘nê’yî ser o vindete û wina va: “Seba mi vatişê ‘nê’yî yeno manaya wayîrvejîyayîşê îrade û estena xo. Vatişê ‘nê’yî yeno manaya qebulnêkerdişê neheqîyan. Nika hemserek û parlamenterê HDPyî tewqîfkerde yî, akademîsyen, rojnameger, avûkat û sewbîna hetan ser de zextê girdî estî. Komele û sazîyê ke weşanê alternatîf kerdênê, heme ameyî padayîş. Cok ra vatişê nê vera nînan de waştişê azadî, aştî, edalet û rûmetê merdimîye yo.”
Ê zî qebul nêkenî
Karakaşliye qiseykerdişê xo de va ‘hêrişê topyekunî ser komelî de estî’ û qiseykerdişê xo wina qedênaye: “Mîyanê ermenîyan de zî fikrê cîya-cîyayî estî. Kesê ke polîtîkayanê hukmatî ra kêfweş î zî estî. Labelê bitaybetî ciwanê ke nizdîyê HDPyî de vindenî, vera nê polîtîkayan de îtîrazê înan esto. Ma babeta Parlamenterê HDPyî Garo Paylanî de zî dî ke mesele ermenî bîyayîş nîyo, mesele ermenîyo muxalîf bîyayîş o. Ez veng dana her kesî; wa her kes vera nînan de bivindero. Wext wextê bi hawayo ortax têkoşîn nîşandayîş o.”
ŞÛJIN/STENBOL