Îzahatê nuştekî de Konseya Rayverîn ê KCK hayr ant qerardarîna kombîyayişê aşma Çile yê Konseya Rayverîn ser û da zonayene ke qerarê zaf muhîmî ameyê girewten. Îzahatî de vajîya ke kombîyayiş de xoverdayîşê xorayverî û serra 2016 ser o ame vindetene .
Konseya Rayverîn hayr ant rewşê Şengalî ser û her kesî ra waşt ke hardê Êzîdxan bipawê. KCK dîyar kerd ke problemê ke Iraq de yenê ciwîyayiş çimeyê xo mezhebî û nîjadperestîya netew-dewletî ra gênê û pêrokîn partî û sazgehanê kurd ra waşt ke babeda xelesnayiş û xoserîya Şengalî de bi verpersîyarî hereket bikerê.
Tayyîp Erdoganî krîz û kaosî giran kerd
Konseya Rayverîn ê KCK vist vîrî ke statukoyê se serra 20. ke ser qirkerdişê kurdan ronîya têk şî û hemsencî û statukoyê newî ronîyenê. Îzahatî de hayr ancîya serra 2017 de tekoşîna kurdan ser û wina vajîya: “Ronayişê statukoyê newî de pêrokîn parçeyanê Kurdistan de tekoşîn do bîro berzkerdiş, ser zemîna xelesnayişê şarê Kurdistanî, do pêşengîya şoreşa demokratîk ê Rojhelato Mîyanên bîro kerdiş.” KCK da zonayen ke şarê Kurdistan çehar leteyanê Kurdistanî de nezdîye azadî bîyo.
Îzahatê nuştekî yê Konseya Rayverîn ê KCK de vistîya vîrî ke AKP bi kombîyayişê 30’ê Cotmeha 2014’î qerarê şerî da û bi nameyê ‘Paketa Tîvarîye’ qanûnê ke xo şerî ra kenê hadre vetî. Konseya Rayverîn ard vîrî ke Tayyîp Erdoganî bi redkerdişê Mitebeqata Dolmabahçe û netîceyanê weçînayişanê 7’ê Hezîranî, bi na derbeya sîyasî Tirkiye de qonaxeke newî da destpa kerdiş ke krîz û kaos giran bibo.
Bi rihê fedaî û xoverdayişî
Îzahatê ê KCK da zonayen ke serdestîya AKP-MHP do 2017’î de zî seba tesfîyekerdişê Hereketê Azadîye Kurd hêrîş bikero û wina va: “Nayî ra zî 2017 dûştê kolonyalîzma qirker do bibo serra xoverdayiş û şerê girdî. Gerîla û pêro quwetê azadî dê bi rihê fedaî û xoverdayişî yê 2016’î pêrokîn îmkananê tekoşînî seferberê tekoşîna 2017î bikerê. “
KCK hayr anc mîsyonê aşmanê wesarî ser û veng da pêrokîn şarî ke aşma Sibate ra tepya tekoşîna xo her ca de berz bikerê. Îzahatî de vajîya ke bi îtifaqê AKP-MHP wazîyeno hereketê serbestî û quwetê demokrasî qir bikerê.
Cepheyê kolonyalîzma qirker de qelişeke
Konseya Rayverîn herzewbîn hayr ant referandûmî ser û vist vîrî ke seba kurdan vatişê ‘Nê’ ya dûştê destûra bingeyîn, yeno maneya ke kurd pêro destûrananê kolonyalîstê qirker red bikerê. Îzahatê nûştekî yê Konseya Rayverîn yê KCK bi nê vatişan dewam kerd: “Kurdistan de referandûmî de berzbîyayişê rêjeya ’Nê’, do bibo referandûma israra Kurdan ya cuya azad û demokratîk. Vatişê ’Nê’ do mavêna cepheyê kolonyalîzma qirker de bibo qelişeke. Vatişê ’Nê’ do ronayişê Kurdistana azad û Tirkîyeya demokratîk de bibo gameke. Desthilatdarîya AKP vînena ke kurdî benê quwet û seba vernîgirewtişê cuya azad û demokratîk no serrekê nîm o hêriş kena. Krîzo giran ke AKP zerre û teber de cuyena û polîtîkayê ke esas gêna îşaretê zeîfî yê û AKP ver şikîyayişî ya.”
Cepheyê quwetanê demokrasî
Îzahatê nuştekî de hayr ancîya cuya azad yê pêrokîn şaranê Rojhelato Mhiyanên ser: “Wexto ke hemverê Desthilatdarîya faşîst ya AKP-MHP quwetê demokrasî bîrê têlewe, wexto ke yewîya neteweyî virazîyo û wexto ke pêrokîn quwetê demokrasî tekoşîn biramnê, do pêrokîn Rojhelato Mîyanên de xelesîya pêrokîn şaran virazîyo.”
KCK aşkere kerd ke “Wextê şaran ameyo” û îzahatê xo bi nê vatişan qedêna: “Tekoşîna bi desan serran ê kurdan do kolonyalîzma qirker biwelişno. Do statûya siyasî yê Kurdan biresno cuya azad û demokratîk. 2017 de teqez do serkewtiş ca bîro.
ANF/BEHDÎNAN