Festîvala ke hetê FEDA, ADEF, Cemîyetê Newede ra Înşakerdenê Dersim, Komeleya Kurmeş, Komeleya Dûştê Tertelê ’38 yê Dersim, Komeleya Pilûr û DersimSpor organîze bena, meşt seatanê şan de sûka Almanya Frankfûrt de destpa kena û di rojî ramena.Bi desan sîyasetmedar, roşnbîr, nuştox û hunermendî tewrê festîval benê.
Festîvala Dersim kî serva girskerdena rêxistinbîyîna mavêna alewîyan de organîzasyoneke gird a.
Bi panel destci kena
Festîval roja Îne seat 17.00î de eve panela “Tertelê Dersim ra na het îdareyê xoser û Dersim a xoser” destpa kena. Pawitox û nuştox Erdal Dogan, çormeger Haydar Çetînkaya, nuştox û cigeyrayox Kazim Cîhan, nuştox û Hemserokê FEDA Erdogan Yalgin na panelî de qisey kenê. Moderatorîya panel kî rojnameger Bakî Gul keno. Seat 20.00î de kî Cem ê Jûyiyî virajîyeno. Hunermend Sena Dersimî û Yildiz Aslan kî dê klamanê (lawik) xo heskerdoxanê xo ra vajê.
Bernameyê esasî yê festîval roja Şembe yo. Festîval do seat 11.00î de bi panelê ‘Şiyayiş ra na het kultirê Dersim de rolê cenîyan’ dewam bikero. Panelîstê na roniştenî zî aktivîsta cenîyan Ozlem Kirmizitoprak, Azaya Meclîsê Partî yê HDP Edîbe Şahîn û sosyolog Ozlem Ûç ê. Moderatora na panelî zî Sûltan Aka ya.
Performansê sehne...
Bernameyê sehne zî seat 13.00î ra tepya destci keno. Hemseroka HDP Fîgen Yuksekdag, Parlamenterê HDP yê Dersim Alîcan Onlu, Hemşaredarê Dersim û qezayanê ci Nûrhayat Altûn, F. Mehmet Macoglû, Tekîn Turkel, Muslim Tosûn, Cafer Kirmiziçîçek, hemşaredarê Dep Bûrhan Kocaman, Hemserokê FEDA Erdogan Yalgin, Serokê ADEF Mûharrem Erdogan, Serokê DEDEF Ahmet Balkis, Hemseroka NAV-DEM Fatoş Goksûngûr, Temsîlkarê Partîyanê Alman ûsb. xêlê kesî dê vejerê sehne û mesajanê xo bidê.
Maya rayverê xoverdayisê Cizîr Mehmet Tûnç Esmer Tûnç, kaykerdoxê Amedspor Denîz Nakî û boksorê namedar Îsmaîl Ozen kî zey meymanê erjayî silayînê festîval bî.
19 hunermend û komê muzîkî yê zey; Grûp Bajar, Grûp Mûnzûr, Ayfer Duzdaş, Hozan Comert, Şengul Pak, Hozan Serdar, Ozlem Baglayan, Veysel Aydin, Zelal Cengîzhan, Volkan Yagan, Alî Haydar Can, Huseyîn Guneş, Levent Ozdemîr, Dîlan&Erkan û Alî Haydar Yildiz’î ra pîya Şaîr Fetîh Koç, Îbrahîm Kilavuz û Erhan Beyazşahîn dê festîval de bivejyê sehne klam û şîîranê xo biwanê.
Vengdayisê Komîteya Hadreyîn
Komîteyê hadreyîn emserr kî kaya ‘Varvara’ xo vîr ra nîkerd û bername de ca abirna. Jîyarê alewî, Senatê destî yê sûk, kultir û gelenegê Dersim kî dê bîrê damûsnayen. Serva domanan kî surprîzê komîteyê hadreyîn estê.
Ser nameyê Komîteyê Hadreyîn Mûsa Aksoy’î 7î ra heta 70 serrî herkesî silayînê festîval kerd. Aksoy’î da zonayen ke sûkanê Koln, Dusseldorf, Hambûrg, Stuttgart û Munîh ra wesayîtê resnayişî amey hadre kerden.
NAVENDÊ XEBERAN