Wextê do dergo AKP hewl dano ke ‘paketa tîvarî’ meclîs ra ravêrno. Verra na paket him miyanê meclîs de him zî hetê şaran muxalefetê da gird esta. Parlamenteranê AKP rîwalê-qandê ke paket ravêrnê zerreyê meclîs de şîdet şixûlnay, çend wekîlê ke verva paket vejiyay kerdî dirbetin. Bi na qanûna ke AKP zey ‘qanûna tîvarî’ bi name kena cewherê xo de qanûnê da faşîstîn a. Bi na qanûn hikûmet fina-onca verra Kurdan, ceniyan, azadîxaştan, verra çormeyanê muxalîf herb îlan kena. Na qanûn zey maqe-qanûna newî yê AKP ya. Bi na qanûn polîs, walî û qûwetanê dewlet rê wezîfeyê hera û jêde yenê dayen. AKP nika nêşena derbeyê eskerî viraziyo, la eslê xo de ferqê na qanûn bi derbeya 12’ê îlonî ra çinyo.
E ke na qanûn bikewo dewre kes ne şeno behsê demokrasî bikero û ne zî behsê heqan. Goreyê na qanûn cil-çina yê Kurdî zey suc yenê hesibnayin. Kesê ke tewrê kombiyayin û nûmayişan bibê rê heta çihar ser ceza do bîro birnayin. Yê ke riyê xo bigîrê rê heta panc ser ceza do bîro dayen. Herzewbîn endî panqart hewadayiş zî zey suc yeno qebûlkerdin. Goreyê na qanûn polîsan rê heqê midaxalekerdişê nûmayişkaran, ya zî heqê kiştişê nûmayişkaran yeno dayen. Wezîfeyê hem-şaredaran zî yenê xespkerdin. Zey nimûne, goreyê na qanûn walî şenê ferman bidê hem-serokanê şaredaran. Eke hem-serokê şaredaran goreyê fermanê waliyan hereket nêkerê cezayê tepiştiş gênê.
Çiyo ke ma na qanûn ra fehm bikerê no yo. Na qanûn bi rihê derbeya faşîstîn ya 12’ê îlone û goreyê menfaatê AKP ameya hadre kerdin. Kesê ke 132 xalanê na qanûn biewnê-niyadê dê boya faşîzmî bivînê. Çi ke na qanûn goreyê felsefeyê ‘jû îtiqat, jew ziwan, jû homet, jû cins, jew welat’ ameya hadre kerdin. Bi na qanûn Erdoğan û AKP împaratoriya xo ya newî îlan kenê. Xo kenê şax û padîşah, pêrokîn welatijan zî zey xîzmetkar û koleyê xo vînenê. Senî ke padîşaxan derheqê kesê ke zey dişmenê xo vînay fermanê sere cikerdin day, bi na qanûn Erdoğan û serrmiyanê AKP zî kesê ke zey muxalîfê xo vînenê fermanê tepiştiş û kiştiş danê. Çiyo ke wazena vaja no yo; bi na qanûn adir kewno keyeyanê şaran. Beno ke jû roj polîs kêberê şima bişikîno, teba nêvajo û şima bitepişo. Beno ke wexto ke şima kuçe de rayşirê polîs gule berzo şima û şima bikişo. Beno ke rîwalê-qandê ke şima cilê-çinayê xo yê netewî xo kerdê şima bitepişê. Tenya e ke şima keyeyê xo ra nêvejyê û teba nêkerê se, belki şima zey bêsûc bîrê hesibnayen. Zewbîn e ke şima serva-qandê heqanê xo bivejyê teber se keyeyê şima veşeno. Ez winî emel kena ke tirkiye butçeyê do gird serva viraştişê girotxaneyanê newî abirna yo. Çi ke badê na qanûn nîmeyê şaranê tirkiye dê zey sucdar bîrê vînayen û tepiştin.
Winî ayseno ke, AKP ya ke bi vatişê ‘çarekerdinê demokratîk’ şaran xapînena nika zerreyê welat de herb îlan kerd.
Weçînayinanê pêroyîn ra çihar aşmê peynî mendî. Bi na qanûna faşîstîn ra AKP wazena ser îradeyê şaran de zext û zorvajî biramo. Bi ters, tehdît û kiştiş wazena ser weçîntoxan xo ferz bikero. Cok ra wextê do dergo verikîn şarê Kurd û çormeyê sosyalîst û mixalifî verdê na qanûn vejyenê, çi ke talokeyê gird vînenê, çi ke rihê derbekar vînenê. La rixmê pêrokîn nûmayiş û hewldayinê muxalefetî, AKP qerardaro ke bi zext û zorvajî na qanûn ravêrno.
Endî tirkiye de pêvaco ame merhaleyê do bîn. Tenya bi ver vetişê na qanûn nê, endî gune-gerek şarî ver dê AKP û hikûmdariya ci de vejê. Weçînayinî serva nay firset ê. Gerek şarê ke endî haştî, birabiyîn, demokrasî û weşiya azad wazenê weçînayinan de dersê gird bidê AKP û AKP îxtidar ra bivistnê war û împaratoriya Erdoğan’î welişnê. Heta ke AKP ser hikûm bo keyeyê kesî de tîj nêakewna. Nayî ra weçînayinan de bi îrade-reyê xo qerar bidê ke şima ciwyan û welatê do senî wazenê.