Piyakariya PDK bi dewleta tirk ramena. Serokê verîn yê herema fedaral ê Kurdistan Mesût Barzanî veriya didi rojan, serva piyakariya newî fina-onca şi Enqera. Esasi de, Barzanî bi sifetê xeyrî meşrû şi pêdiyayinan. Çike, rexmo ke, wextê Serokînê Barzanî qediya, la fina zî bi zorî ser hikim de mendo. Zey Erdogan serva ke îxtidar de bimano her çî keno.
Tewr vêşî zî şarê Kurd zano ke, ziyaretê Barzanî ser xeyrî niyo û raştê nêrazîbiyenan ame. Çike Barzanî Sûr û Nisêbîn nêvînayen ra ame, çimê xo girotî û Enqera de nefes girot.Wexto ke Barzanî şi ziyaretê Enqera, o wext de fekê tank û topanê dewlet açarniyayê Kurdistan bi. Teyareyanê tirk hardê Kurdistan bombevaran kerdî. Wexto ke Barzanî Enqera de bi, çeteyanê AKP sûkanê Kurdistan de teror ramitî. Kurdistan bin ablûqayê îşgalkerdoxan de bi. Bin ablûqa de, kuçeyan de Kurdan kiştî. Mehle, keye û kuçeyan day ver adir û veşnay. Wexto ke Barzanî Enqera de bi cenazeyê Kurdistanijan, yê ke bi fermanê Erdogan, Davûtoglu, Fîdan û Sînîrlîoglu amey kişten hewadiyayî. Wexto ke Barzanî Enqera de bi dayikê Kurd yê ke serva Kurdatiya xo vejyay kuçeyan raştê êriş û heqaretanê polîsanê tirk amey. Wexto ke Barzanî Enqera de bi, piyakaranê ci Til Temir de bi desan Kurdan kiştî û hardê Kurdistan bi gonî kerdî hî. Verra Kurdan lîsteyê binlingkerdişê heqan yê dewleta tirk derg beno şino. Herkes zano, la ma fina perskerê; Barzanî bi kancî sifatî şi Enqera.
Badê pêdiyayinan no Serokê xeyrî meşrû kombiyayinê çapemenî viraşt û aşkere kerd ke; pêdiyayinan de, babedê piyakarî de, bi sermiyananê dewlet pê kerdiyê. Na piyakarî ne sifteyîn na, ne zî peyniyîn. Barzanî ziyaretê tirkiye de sifte bi teşkîlatê îstixbarat MÎT ra ame pêhet. Şarê Kurd zano ke, MİT bi serrano serva tesfiyekerdişê tekoşînê şarê Kurd gurweyeno. Goreyê vatenanê sermiyananê KCK hardê Kurdistan netîceyê îstixbaratê KDP û MÎT de yenê bombevarankerdin. Rexmo ke dewê Başûr amey bombevaran kerdin, dewijî amey kişten, Barzanî dewleta tirk îqaz nêkerd. Hurendiya nayî de PKK sûcdar kerd. Barzanî o ke, serva îxtidarê xo verra şarê xo dişmenî de israr keno, kêberanê Başûrê welat serva dewleta îşgalkerdoxan heta peynî akerd. No piyakarê dişmenanê Kurd, o ke waşt gerîla Şengal terk bikero, ravêrnayinê bi hezaran eskeranê tirk rê îcazet da. Se ke gerîlayan nê, eskeranê tirk şî Şengal û şarê Êzidî qetlîam ra xelesnay. Xo ra biyayiş, tekoşîn û bedelê ke gerîlayan Şengal de da, înkar kerd. Bado ke Şengal xelesiya şi koyê Şengal de damûstayin da û va; “Şengal de heta nika tenya peşmergeyî estbî, neyra tepya zî tenya dê peşmergeyî bibê. Bê-exlaqî û bê-ariya siyaseta Barzanî sînoran nêsilasnena. Serva şarê Kurd ferqê artêşa tirk û çeteyanê DAİŞ çinyo. La Barzanî nika eskeranê artêşa tirk dawetê Başûr keno, nezdiyê Şengal de bi ca keno. Gelo Barzanî garantî dano ke, artêşa tirk do qetlîamo ke DAİŞ nîme virada, eskerê tirk temam nêkerê? Şarê Başûr şiyînê eskeranê tirk rê nêrazîbiyen damûsnenê, vanê: “Ma hardê xo de îşgalkerdoxan nêwazeme û wazenê ke Barzanî na gama şaş ra peyser gam bierzo. La rexmê nê nêrazîbiyenan, Barzahî vano: “Babeda şiyîna eskeranê tirk zaf amê gird kerdin.
25 serriyo PDK kêberê Başûrê Kurdistan dewleta tirk rê akerdo. Dewleta tirk bi seyan reynî, bi îcazetê PDK operasyonê hewayî û erdî viraşt. PDK bi serrano dişmenanê Kurdan xo rê zey dost vîna.
Hêriş û qetlîamanê verra Şoreşa Rojawa de zî gişt û piyakariya PDK esta. Serokê verîn Barzanî, veriya coy aşkere kerdbi ke, “Rojawa de Şoreş” çinyo. Zey Erdogan’î ey zî şarê Kurd înkar kerd, hedef girot. Erdogan, yê ke tirk û misilman niyê înkar keno, Barzanî zî, yê ke PDK’yî niyê înkar keno. Tewr peynî de Til Temir de, netîceyê piyakariya dewleta tirk û DAİŞ de verra Kurdan jû qetlîamê da gonîn viraziya û bi desan welatijan weşiya xo kerd vinî. Rexmê nê qetlîaman Barzanî hewna zî bi kiştoxanê Kurdan ra îtifaq û piyakarî keno. Çi ke Barzanî tenya malbata Barzanî girotiya bin garantî û ser şarê xo de barazey keno. Goreyê zonayişan ziyaretê peynî yê Enqera de zî, verra Qendîl plansazeyê operasyonê eskerî yê newî ame qisey kerdin. Jû qiseya verênan esta; “mi rê imbazê xo vaj, ez vaja ti kamê.” Eke imbazê Barzanî Erdogan bo, hewna kam ci ra çi paweno.