Sene demserr a. Pirrê nakokî ya. Çimê zerya xo çînê.
Daristan kewe nêbeno, leyî tolebiske ranêkenê, cemedînê serdiniya na wisarî de.
Wisarî dîna bena zergun, welatê ma de her çî genciya xo keno mezele kowan de.
Lawikê xo gonin yê.
Pêro esqî ginenê waro bêwaxt, bêbext, demserra wisarî yê welatê ma de.
Bervîs?
Bêmavên naleme, lilika çimanê ma de hayleme wo, zelemel a, şiwarê goninî vajînê.
Heştîrê ma kî zovîna yê, na wisarî. Mendêro awa hengura şaye.
Çimanê mara gonî gindir bena. Liskê ma benê saya sure. Ciwiyayîsê ma jê ciwiyayîsê sarê bînî nîyo. Her çîyê ma sur û surela wo.
Huyayîs?
Huyayîsê ma de kî heştîrê surî estê. Heqin bîyayene kî merdena welatê ma de.
Herdê ma, mara herediyo, pencunê ma weyiye nêkeno.. Coka leyê ma honake tolebiske ranêkerdo, cemedînê, mirenê na wisarî.
Koyê ma, mara herdiyê sawoke esketê xo ma nêsevknenê, na wisarî.
Wisaro heneno ke, sawoke xozanê xo biyo ‘qorucu’.
Ça daristan pelg ranêkeno, ça herdê xo penc weyiye nêkeno, ça leyan bê tolebiske dano waro na xozan, ça?
Xozanê ma, marê biyo xiyanetkar. Cayê gulan esqê na wisarî de çîno emser.
Qurveta mirçikan, bilbile zonê xo qilotno ro na wisarî.
Teyna ma waneme sewûroz genciya xorê.
Mayê ma biyê xezna derdanê genciya xo. Nalênya xo herd û asmên nana pêra na wisarî.
Jû zulmo şa piloşiyo ma ro.
Jiyarana xora ma herediyayîme. Ma nêseveknayme roza tenge de. Peyniye de zulmî şayî ma bi jiyaran ra ardîme têverver, kerdîme dismenê jûvînî.
Na wisarî, merdena ma 24ê adare de dest kerd ci, Bedlîs-Xizan de. 15 leyî hen ginayî herd ro, herdo ke mara herediyo, pencunê ma weyiye nêkeno.
Ma qutiya Pandor ra nasivê xo nêmezet gureto. Zeus qutiye dê Pandora vat, cigera mi na qutiye rameke. Pandora meraq kerd qutiye tenê kerde ra onca qapakerde. Na rakerdene de qutiye ra xiraviye vejiye, nêweşiye dîna de biye vila, omid zerre de mend.
Xêle waxt naye ra dima, Pandora onca meraq kerd, onca qutiye kerde ra. Na raye qutiye ra weşiye û omid vejayî, dîna ra bî axme.
Çi hêfke ma nêweşiya qutiya Pandora ra bara xo gurete, hama weşiye û omidê qutiye ma nêreştî. Coka wisarê ma gonin o, coka heştîrê ma sur û surela yê.