Berenê hesreta welatî mi ra, mi kî hesreta welatî ra bipersê.  Bi serrano ke ez hesrete rê wanena, hesrete kî zê pepugî mi rê wanena. Kes halê mi û hesreta mi  nêzano. Mordem ke bi serran welatê xo ra durî xerîbîye de mend, helbet hesretê mordemîkî zereyê mordem de zê çêmê wusarî zîngenê û dîngenê. Hesreta mi kî zereyê mi de zê çêmê wusarî, zê çêmê Goşkarî, zê çemê Muradî, zê çemê Munzurî zîngena û dîngena. Yanê hesretî zereyê mi de mekan gureto, mi rêmeymanê.


Aaax welat! 

Welatê bav û kalê mi, ez nika to ra zaf durî ya. Hesreta mi nika qat bi qata. Nêzana na hesreta xo, na birîya xo se bîyarî ra ziwan? Ez nika to ra zaf dûrîya, la ez oncîya bi royê xo, bi xeyalane xo, bi royê canê xo koyanê to ra, çem û çungayanê to ra, dar û daristananê to ra, kemer û kuçanê to ra, ra û rêçanê to ra... game bi game cêrena. Qey cêrena, to zana? Ez re xeyalanê xo cêrena, ez re domantêya xo cêrena, ez re hevalanê xo cêrena, ez re azadîya xo cêrena, ez re ziwanê xo û ez re kamîya xo cêrena. 

Welat ra durî xerîbiye derîme. Çiqas ke bi hazar kîlometreyan welat ra dûrî bîme kî, welat her dem zereyê ma de, royê ma de û koşeyede mezgê ma der o. Ma bi axa welatî kûme ra û bi axa welatî kî vazeme ra. Welat estbîyen û çînebîyena ma wo. Welat şîrino şîrin. Welat royede canê ma wo. Can dano ma, ro dano ma û reng dano heyatê ma. 

Welatê min o bindest! Ez hesreta to ver nalena, kalena û zibena. To hesreta min a. To sondê min a. Ma bi nameyê to sond weme. Welatê min o bindest! Kezeba min a ke seba welatî bîya lete-lete a kî êdi derman nêcena. Ez nika sene wele bi xora kerî?  


Wusar êno welatê mi

Qey hona welatê ma bisînor o, qey? Qet merex mekerê, a roje kî helbet êna û welatê ma beno azad. Wusarê welatê mi nezdî der o. Wusar êno welatê mi û gulsosinê ke azadîya welat ra hesretê mendê, ey kî roje xo bi azadîya welatî xemelnenê.

Welato! Welat ez a, ez welata. Ez hardanê to sero guna waro, vaşta ra û bîya pîle. Mi hardanê to sero bi kêyf weşîye kayî kaykerdî, derd û kederê dinya hetê de la oncîya kî ma hardanê to sero serbest bîme, bi kêyf, bi eşq û bi sewda bîme. Kanê eşq û sewda mi? Kanê domanîya mi? Ez nika nê persanê xo kam ra bipersî û kanta şorî?  Ewro kî welat ra dûrî xerîbîye derîme. Heya, ma welat ra dûrî xerîbîye derîme, la welat her tim, her seate, her waxt royê canê ma de, huwayîşê ruyê ma de, bermayîşê çimanê ma der o. Birîye û hesreta welatî êndî zerrêyê ma de mekan gireto. 


Seba welatê xo canê xo feda kerdî

Heya bawo, hesret mendîme ma û pî rê, hesret mendîme way û biray rê, hesret mendîme heval û hogirî rê, hesret mendîme der û cîranî rê, hesret mendîme bawo, welat ra dûrî mahrum û vile çewt mendîme. La ewro kî welat ra dûrî kewtîme. Bîyîme xerîbê welatê xo. Ax û waxa welatî zê kermê dare zereyê ma werd. Kamaxa xerîbîye de bîyîme wayîrê derd û kulan. 

Ma ke welatê xo rê wayîr mevecîme, rêça linganê ma bena vîndî şona. Coka xatirê welatê xo bizanîme, qedr û qimetê welatê xo rind bizanîme. Welatê ma hona bindestê zaliman der o. Oncîya miletê ma zaliman dest xêyle ont û hona kî oncenê. Hardanê welatê ma ser o xêyle gonîya miletê ma yê mazlumî rişîye û hona kî rişîna. Seba raxelesîyena welatî înan canê xo feda kerd.