Bi armanca hazirkirina belgeyan Desteya Hazirkirina Belgeyên Rêveberiya Xweseriya Demokratîk hatibû avakirin. Desteyê jî xebatên xwe wekî komîteyên “Diyarkirina Rengê Rêveberiyê”, “Çêkirina Qanûna Hilbijartinê” û “Amadekirina Hevpeymana Civakî” meşandin. Endamê Desteyê Talal Mihemed derbarê van xebatan de agahî dan û destnîşan kir ku xebatên wan ên li ser diyarkirina rengê rêveberiyê bidawî bûne û yên herdu komîteyên din jî ber bi dawiyê ve diçin. Mihemed, da zanîn ku ev xebatên wan jî bi dawî bibin, wê beriya sersalê ji bo kombûna Meclîsa Çêkirina Qanûnan a Demî wê bang li endamên meclîsê bikin. Mihemed, diyar kir ku ewê di civînê de encamên xwebatên xwe û pêşniyaran pêşkêşî meclîsê bikin da ku di sala nû de pêngavên pratîkî bêne avêtin.
Talal Mihemed, destnîşan kir ku xebatên ku komîteyên wan didin meşandin û encamên derketine holê, wekî pêşnûmayê/pêşniyaran e, lewre ew niha nikare derbarê naveroka wan de agahiyan bide, lê ewê pêşniyar bikin ku ji bilî rêveberiyên kantonên Efrîn, Kobanî û Cizrê yên xweser di qada leşkerî, aborî û asayîşê de rêxistinbûn an jî hevbeşiyek (muşterek) giştî hebe. Mihemed anî ziman ku ew ji xebatên rêveberiyê bi hêvî ne û wiha got: “Hemû niştecihên herêmê di nav de cîh digirin û ev xebata me wê bibe tovê çareseriya pirsgirêkan û avakirina Sûriyeya demokratîk.”
ANHA/QAMIŞLO