Ê ke mecbûrî nê di aşman de bixebitîyî homa hetê înan bikero. Mesela xebatkaranê înşatî ra asinbestoxî û îskeleviraştoxî gureyê xo teber de kenî û a tince ver xebitîyenî û ereq çareyê înan de sey laserî bila beno. Ti bivajî ke wa nê xebatkarî nê seatan de nêxebitîyî, wextê honikan de bixebitîyî kam qala to goştareno. Hende ke şertanê zoran de xebitîyenî ke ge ge xebatê înan mergî reyde zî qedîyeno.
Eke ma şarê xo ser ro texirîyenî şarê ma yê xebatkarî zî est î û rewşa înan qet baş nîyo. Û nanê xo mîyanê adirî ra vejenî û zaf gureyanê tehlukayan de xebitîyenî. Goreyê nê tehlukayan ra heqê xo gênî? Ney. Hem karê înan tehluke yo û hem zî zeynayîşê înan tay o. Ma mecbûrî înan ra wayîr bivejîyî û nê merdimê ma sey merdiman bixebitîyî û sey merdiman heqê xo bigêrî. Nê xebatkarê ma di hetî ra maxdûr î û destê ma ra nêyeno ke di hetan ra qe nêbeno yew hetî ra ma rewşa înan baş bikerî. Gune nîyo nê merdimî na tince ver de heyanê şanî xebitîyenî. Eke meeşê înan baş nêbeno wa asinbestoxî barî tince ver nê, sey de cayê honikî de bixebitîyî.
Îskeleviraştoxî zî semedo ke seviknayîşê înan tam nêgêrîyeno her serr înan ra çend tenî îskeleyî ra kewenî mirenî. Û çewî ra veng nêvejîyeno çirê merdî. Heyf û gune nîyo bîlasebeb nê merdimî mirenî. Xora nê merdimî serre de çend aşmî xebitîyenî û çi meeş gênî zî înan ra qêmî nêkeno û xasikî zî nê gureyî de merg zî est o. Hadê ma fehm kerd teber de germ de xebitîyenî la çirê bê wayîr î ke bê seviknayîş xebitîyenî? Perseyo xişn her serre xebatkaran ra çend tenî mirenî la çi heyf o ke çare nêvînîyeno. Nê zî merdimê ma yî, ê zî heq kenî sey merdiman bixebitîyî û biciwîyî.
La bîlasebeb tena xebatkarê înşatî mirenî? Hamnan de karkerê zîratî zî sey bê qiymet mirenî. Kê xeberan ra goşterenî falan ca de traktor qelibîyaya yan zî falan ca de mînîbuse qeza kerda mîyanê înan de çend karkerî est î zaferî merdî. Xora eke mînîbuse 15, 20 tenî gêna ê 35, 40 tenî gênî, troktorî zî abiasa. Û kê vînenî ke nê xebatkarî pêro zî kurd î û seba di, hîrê kûrişî vejîyayî xurbet û no xurbet înan rê biyo merg.
Şarê ma feqîr û belengaz o, şarê ma nezan û bêçare yo. Ma wayîrê şarê xo nêvejîyî ko şarê ma na hawa hîna zaf bîlasebeb bimiro. Û no, çarenusê înan nîyo. Nê pêro bê wayîreyî ra vejîyenî. Wa şarê ma teber de rayîranê xerîban de nêmirî. Wa memleketê xo bixebitîyî, eke ma wayîr bivejîyî, hetê ekonomîye ra çareyê înan bivînî ê ko nêşîrî memleketê xerîban nêxebitîyî. Ma memleketê xo şarê xo ra wayîr nêvejîyî no şar mecbûr maneno şono teber de xebitîyeno. Memleketê xo de nêeşka nanî biwero, dormeyê ey zî ey rê hetkerdiş nêkero se bikero? E, beno ke tayê çîyan ra destê ma nêreso û çare nêbo la merdimê xo ra hetnêkerdiş û çarenêdîyîş qet qebul nêbeno. Ma bi xo tena est nêyî, ma şarê xo temamî reyde est î. Heme merdimê ma, ma rê sey maye û pîyê ma erjaye yî. Û bar o ke xebatê înan ê tengayî zî çareser bî.
Zerweş ESNAW