Nuştox û rojnameger Seda Guler Kaya dîyar kerde ke sîstemê serdest yê camêrdan tena cinîyan nê camêrdan zî binpay keno û seba ke nêseyyewbînanî raşte ra wedarîyo ganî camêrdî bibî wayîrê fehmî. Kayaye derheqê keye û rolê dayikbîyayîşî de qisey kerde û va: “Şîdet û kiştiş tena problemê cinîyan nîyî. No problemê camêrdan o. Problemê ke camêrd awan kenî û camêrdan ra virazîyenî estî. Problemê ke estî pîya yenî çareserkerdiş. Ganî na babete de cigêrayîş bêrî kerdiş.”
STENBOL
3 mîlyon lîre ame xerckerdiş
Mudirîya Herême ya Weqfan 2015î de seba ke awe kewtêne camîyê tarîxî yê Doşemeyî yê Riha û zemînê camî ver bi Gola Maseyan de şîyêne dest bi restorekerdişê camî kerde. Her çiqas ke 3 serrî derbaz bibo zî restorasyonê camî hema nêqedîyayo. Seba restorekerdiş îhale ame kerdiş û îhale de ame vatiş ke ganî restorasyon heta 2017î biqedîyo. Adara 2016î de xebat ameyî vindetiş. Goreyê îhaleyo newe zî ganî 2019î restorasyon biqedîyo. Ame zanayene ke heta nika 3 mîlyon lîre ameyo xerckerdiş.
RIHA
Birîndar hucreyo yew kesî de tepişîyeno
Koyê Gabarî yê Şirnexî de 31ê teşrîna verêne de operasyonê leşkerî pê ame. Operasyon de endamê HPGyî Emrah Naycîyî birîndar ame tepiştiş. Naycîyî 7 rojan binê çiman de mend û ame tewqîfkerdiş. Naycîyî aye roje ra nata bi hawayo birîndar Zindanê Tîpa Tyî yê Şirnexî de hucreyo yew kesî de yeno tepiştiş. Ame dîyarkerdiş ke bedenê Naycîyî de parçeyê şarapnelî estî û hucre de yeno tepiştiş. Ame musayene ke Naycî seba tedawî muracat kerdo, la heta nika ti cewabêk nêgirewto.
ŞIRNEX
Nasname ver nîna amelîyatkerdene
Taxa Mevlana ya qezaya Şehîtkamîlî ya Dîlokî de dayîka 4 domanan Cemîle Demîrhana 68 serrî seba ke qeyda aye ya nufusî nêameya viraştiş nasnameyê aye çin a û nêeşkena şêra nêweşxane. Seba ke kerra Demîrhane de esta, ganî bi hawayo lez bêra amelîyatkerdiş. Torinê aye Huseyîn Akayî dîyar kerd ke ê muracatê Mudirîya Nufusî kerdî û Mehkemaya Dîlokî de doza înan dewam kena. Akayî ard ziwan ke rewşa dapîra ci xidar a û nêweşxane nêewnenî.
DÎLOK
Tena yew mamosta estbî aye zî ameye îxraçkerdiş
Dêrsim de mamostaya matematîkî Tîjda Kiliçe seba ke mamostayîya bi heq bikera 3 aşmî verê cû muracatê Mudirîyeta Perwerdeyî ya Qeza kerde. Badê demêk muracatê Kiliçe ameye qebulkerdene û Mektebê Mîyanên yê Pulumurî de dest bi mamostayî kerde. Kiliçe 3 aşman ra dima bin nameyê ‘cigêrayîşê ewleyî’ kar ra ameye eştene û 10ê kanûne de nuşteyo ke aye rê ameye erşawitene de ame vatiş ke ‘wezîfeyê mamosta Kiliçe ameyo betalkerdiş.’
DÊRSIM