Panel de babedê ‘Ziwanê ma senî xelisîyeno?’ û ‘Têkilîya Ziwan û Sîyasetî’ amey munaqeşe kerden. Panel o ke Merkezê Cîwanîye yê Weysel Belgînî de Karşiyaka de virazîya eleqeyekê gird ant. Panel o ke moderatorîya ci îdarekarê Kurdî-Der Yaşar Balûken’î kerd de ziwannas û nuştox M. Malmîsanijî ser babêta “Kirdkî senî xelesîyeno" de qisey kerd û hayr ant polîtîkayê qirkerdenê kulturî yê dewlet ser.
Kemalîzm webayê kurdkî yo
Mamoste Malmîsanijî da zonayen ke Kemalîzm webayê ziwanê kurdkî yo û vist vîrî ke qedexeyê ke dewlet ronay ver avey şîyayişê ziwanê kurdkî de bî manî. Malmîsanîj’î vist vîrî ke serdestan kurdan ard merhaleyekê hina ke ziwanê xo ra şerm kenê. Ziwannas Malmîsanij’î eleqe ant tedbîranê verîgirewtişê mergê kirdkî ser û hina va: “No problemekê zaf gird û zehmetin o. Ziwanê ma sekrat o (gangêr), ganîverd de yo. Nayî ra tekoşîneke zaf gird lazim o, tedbîrê girdî lazim ê.” Malmîsanij’î behsê şertanê ewroyî kerd û va: “Ewro ziwanê ma nêkişenê, la mergî rê werte de veradanê, yew mudaxale çinyo, perwerde çinyo. Teyna tayî zangehan de zey sembolik dersî estê.
Meseleya ziwanî meseleya îxtidarî ya
Parlamenterê HDP yê Çewlig’î Hîşyar Ozsoyî zî "Têkilîya Ziwan û Siyasetî" ser o qisey kerd û hayr ant psîkolojîyê şarî yê ziwanî ser. Ozsoy’î vist vîrî ke wexto ke o dew bi dew geyreno û bi welatijan ra bi kirdkî qisey keno, la dewijî bi tirkî cewab danê ci. Ozsoy’î behsê polîtîkayê dewlet yê kultur û ziwanê kurdan ser o ramitî kerd û va: “Na dewlete yew felaketî ard ma ser. Ma, pî, maye,ziwan û ma bi xo ra da şarmen. Meseleya ziwanî meseleya kulturî nîya, meseleya îxtidarî ya.”
Welatijê ke tewrê panel bî zî veng day kurdan ke eve ziwanê maye xo de qisey bikerê, wayrê zonê xo bivejyê. Welatijo bîn o ke panel goştarî kerd zî aşkere kerd ke zon ebe qiseykerdiş xelesîyeno û herkesî ra waşt ke her ca de bi zonê xo de qisey bikerê.
NAVENDÊ XEBERAN