Şaredarî 51 cinî pa 40 gedeyanê xo îstasyonê gama awiline û stargehî de kerd mêman, destegê psîkolojîk û huqûqî da înan.
Serekîya Dayîreyê Polîtîkayanê Cinîyan ya Şaredarîya Bajarê Girdî ya Amedî semedê xebata vera şîdeto ke cinîyan rê beno de mucadele Xetê Destegê Lezgînî akerd û mîyanê heşt aşman de 38 cinîyan ci rê muracat kerd.
Problemê ci amey safîkerdiş
Goreyê zanayîşo ke Serekîya Dayîreyê Polîtîkayanê Cinîyan ra ame girewtiş, cinîyan ra 50ê xo bi 40 gedeyanê xo hetê Xetê Destegê Lezgînî ra ameyê qebûlkerdiş û înan ra 7 cinî û 8 gedeyî semedê tehlukeyê asayîşê ganê înan neqlê stargehî bîyî. Beyanat de wina ame vatiş “44 cinî û bi 36 gedeyanê xo wexto ke Îstasyonê Gama Ewiline de mendêne problemê înan ame safîkerdiş û sazî ra ameyî erşawitiş. 7 cinî bi 4 gedeyan Îstasyonê Gama Ewiline ra neqlê Stargeho ke girêdayîyê Mudirîya Şaxa Vera Şîdeto ke Cinîyan rê Beno yo bîyê. 6 cinîyê ke raştê şîdetî ameyî û waştênê qerarê pawitişî bigîrê zî neqlê Mudirîya Asayîşî bîyê. Heto bîn ra destegê pskolojîk dîya 9 cinîyan, 16 cinî ke waştêne mêrdeyanê xo ra cêra bibê neqlê Baroya Amedî bîyê û 6 cinî zî neqlê Merkezanê Astangkerdişê Şîdetî (ŞÖNİM) bîyê. Hetê psîkolog û pisporanê Mudirîya Şaxa Vera Şîdeto ke Cinîyan rê Beno ra, 2 cînîyê ke teşebusê întîxarî kerd rê mudaxele ame kerdiş.”
Bi xetê destegê lezgînî vera şîdetî tekoşîn
Mudira Şaxa Mudirîya Vera Şîdeto ke Cinîyan rê Beno ya Serekîya Dayîreyê Polîtîkayanê Cinîyan Nîhal Bozhan Ozbeke derheqê nê xebatan de zanayîş da. Ozbeke wina va “Xebatê teqîpkerdiş û astengkerdişê şîdeto ke cinîyan rê beno pê 2 stargeh û xetê şîdetî benê. Çarçewaya vera şîdeto ke cinîyan rê beno de xetê 444 79 49 numreyîn 7/24 xizmet dano. Cinî ke raştê şîdetî yenê, asayîşê ganê înan tehluke de yo û qayîlê destegê psîkolojîk û kuqûqî bigîrê ma reyde kewenê têkilî û ma xizmetê şêwirmendî danê înan. Wexto ke ma cinîyan de pêvînayîş kenê, eke destê ma ra çîyêk bêro ma kenê la eke nêro ma înan neqlê cayanê bînan kenê.”
Kesê ke şîdet vînenê wa ma bigêrê
Ozbeke îzah kerd ke cinîyê ke raştê şîdetî yenê û asayîşê ganê înan çin o hetê Şaxa Teqîpkerdiş û Astengkerdişê Şîdeto ke Cinîyan rê Beno ra yenê qebûlkerdiş û wina va “ Ma tena gerreyanê cinîyê ke raştê şîdetî yenê ney, yê kesê ke benê şahîdê şîdetî zî qebûl kenê. Cinîyê ke semedê starbîyayîş muracatê ma kenê bi gedeyanê xo yenê qebûlkerdiş.” Ozbeke waşt wa cinîyê ke raştê şîdetî yenê û benê şahîdê şîdetî xebere bidê înan û înan de bikewê mîyanê têkilî.
AMED