Fermandarê rî huyayî. Fermadarê şer. Ça de şer bibenê, ça de tehluke bibenê uca de bi. Wexto ke Kobanê kewt tehluke uca de bi. Çeteyanê DAÎŞ’ê hêrîşe Berê Murşîd yê Kobanê kerd, vernîye herkesî de ber pawit. Birîndar (dirbetin) bi. Birîndarîyê eyê hina zaf bibi kî nêamenê hûmartiş.
Wexto ke dor ame Teşrîn, fermandarî va ez esta. Teşrîn ame rizgarkerdiş, dor ame Minbic, reyna va ez esta. Minbic bajarê eyê bi. Xelesnayişê Minbic xeyalê eyê tewr gird bî. Kewt vernîye şervananê xo û şi ser çeteyanê AKP-DAÎŞê. Pê rî huyayîş û cesaretê xo ame şinasnayîş. Dinya de bi veng û deng. Wexto ke 3ê Hezîranê de şehîdkewt, Amerîka zî derheqê şehîdbîyayîşê eyê de aşkerekerdiş da. Şehîdbîyayîşê eyê dima ra nameyê operasyone Minbic zî ame vurnayîş û bi 'Hemleya Xelesnayişê Minbic yê Ebû Leyla'. Bawê (Ebû) Leyla. Fermandarê Şems El-Şemal û Azayê Fermandarîye Meclîsa Eskerî yê Minbice Bawê (Ebu) Leyla.
Xeyalê tewr gird yê Bawê Leyla azadkerdişe Minbîc bî. Xeyalê eyê ame ca. Şervananê eyê xeyalê eyê ard ca. Hinî Minbic azad o. Minbic bajarê kehan yê şarê kurdî yo. Şerefnameya Şerefxanê de yeno nuştiş. Goreyê Şerefxanî şaro ke Minbic de ciwîyeno, hema hema zafê eyê sey kurd ameyê hesibnayîş. Şerefxan vano ke, eşîrê Elbegî, Beraqî,Berazî û Reşîyan ayê ke Minbic û dor û verê Minbic de ciwîyenî pêronê înan kurd ê. Minbic zî bajarêk Kurd û Kurdistanî yo. Minbic hem bajarêk Kurdistanî yo hem zî bajarêk zaf stratejîk o. Rayîrê ke hetê Enteb û Helebî, Reqqa, Kobanê înan ra şinî Minbic resênî yewbîn û benî yew. Yane Minbic hetê şîyayîş û ameyîş de yew corak û merkez o.Muhîm o.
Azadkerdişê Minbicî xora vernîyê zafê çîyan akeno. Minbicî dima ra Bab,Qebasîn û Marê bêrênê rizgarkerdiş, Kobanê û Efrîn benî yew. Rojawanê Kurdistanî bi temamî azad beno. Parçeyêk Kurdistan yê azad xerîtayê dinya de ca geno. No bi xora hevsengê (denge) Rojhelate Mîyanên bedilneno. Rojhelate Mîyanên de quwetekê newe tarîxê dinya de beno rewa. No quwet Hereketa Azadî û şarê kurdî yo. Bi awankerdişe Rojawanê Kurdistanî ra rewşe hina vejîyenî werti.
• Role dewleta tirkî Rojhelate Mîyanên de nêmaneno. Dewleta tirkî sey verê cû nêşkena xo biroşo pîyasayê dinya yê Ewropa, Emerîka û Ereban.
• Eleqeyê dewleta tirk û ereban yeno birnayîş. Kurdistan kewno mabenê welatê ereban û dewleta tirkî.
• Şirîkîya (pîyakarî) Tirk, Qeter û Suudîyan yeno xirabkerdiş. Nêşkenê sey verê cû ser rayîra gaz û neft stratejîyan awanbikerênê. Role çeteyanê DAÎŞ, Ahrar-El Şam û Fetîh El Şam zaf nêmaneno.
• Rayîrê stratejîk yê gaz û neft kewnê destê kurdan.
• Modele îdarekerdişe Rojawanê Kurdistanî, qey (serva) pêronê şaran beno yew modele azadîye.
Rizgarkerdişe Minbic û awankerdişe Rojawanê Kurdistanî hina stratejîk û muhîm o. Helbet bajarê Minbic pê bedêlên zaf giranî ame xelesnayiş. Fermandar Bawê Leyla, Sîdar (Soro-Remzî Tanrikulu) û Şîrîn (Mehmet Nergîzlî) mîyan de se zêdeyîr zî şehîdan gan û gunîya xo da, Minbic hina (winî) ame azadkerdiş. Azadkerdişe Minbicî pêronê şarê kurdî ra fîraz û bimbarek bo. Wa cinî û camerdî kurdî zî tilîlîlî biancê. Hinî (êdî) Minbic azad o! Tilîlîlî Minbic!