Rojnamegere Denîz Firate (Leyla Yildiztane) 8ê Tebaxa 2014î de netîceyê hêrişê çeteyanê DAIŞî yê Kampa Mexmurî de şehîd kewte û ewro serrgêra 4. ya şehadetê aye yo. Denîze ananeye çapemenîya azade dewrê embazanê xo kerde.
Dayîka Denîze Sultan Yildiztane va ‘ma cuya xo ya 27 serranê koçberîye de 4 domananê xo şehîd dayî’ û wina domnaye. “Labelê şehadetê Denîze ma rê zaf giran ame. Denîze emro şenik de beşdarê têkoşînê azadîye bîye û 22 serrî têkoşîn daye. Rojnamegere bîye. Ma qet bawer nêkerdêne ke aye do şehîd bikewa.”
Dayîke Yildiztane daye zanayene wexto ke aye eşnawite ke waya aye Bêrîtane do şêro Wan, aye ra va ‘eke ti şîya Wan, şo Gola Wanî û herinda mi de çay bişime’ û wina dewam kerde: “Ez vatişê aye ra zaf tesîr bîya. Denîze hertim hesretîya welatî cuyayêne. Denîz bîye sembola Mexmurî. Heta ke kesê sey Denîze estî, kamera û qelema aye erd de nêmanena. Mi cayê ke aye şehîd kewtbî de dara zeytûnî ronaya. Ez her ke boya aye gêna mîyanê xo, boya aye yena. Ma do waştişê aye bica bîyarî.”
Şarî aye tena nêverda
Pîyê Denîze Narîf Yildiztane zî hêrişê DAIŞî da vîr û wina va: “Ma ser wesîyeta kênaya xo, cenazeya aye berd Wan. Şarê ma wayîrê cenazeya Denîze vejîya û ma tena nêverdayî.” n JINNEWS / MEXMUR