Bajarê Bîelî yê Swîsre, paytextê Awusturya Vîyana û bajarê Munîhî yê Almanya de ê ke qirkerdişanê Sêwas û Çorûmî de merdbî ameyî vîrardene.
Bajarê Bîelî yê Swîsre de rayberîya Federasyonê Elewîyanê Demokratîkan (FEDA) de Dergahê Reya Haqî de aktîvîteyêk ameye organîzekerdene. Aktîvîte de mûmî ameyî tafînayene û kesê ke qirkerdişanê Sêwas û Çorumî de merdî ameyî vîrardene. Paytextê Awusturya Vîyana de zî hetê FEDA ra aktîvîteyêk ameye organîzekerdene.
Bi heman waştişî aktîvîteyêk zî bajarê Munîhî yê Almanya de ameye viraştene. Vîrardişo ke hetê FEDA ra ame organîzekerdene de bi nameyê federasyonî Ayten Sîmsîre bale ante polîtîkayê qirkerdişî û asîmîlasyonî yê dewlete yê vera Kurdan û Elewîyan de ser û wina va: “Qirkerdişê Dêrsim, Koçgîrî, Gurgûm, Çorûm û Gazî heme bi heman zîhnîyet ameyî viraştene. Seba ke nê qirkerdişan de bêro têrî ganî têkoşîn bêro xurtkerdene.”Pîr Alî Balî zî da zanayene heta ke şar û îtîqatî azadîya xo dest nêfînê erjanê xo vînî kenê. Aktîvîte bi deyîşanê Ozan Delîl Xidirî qedîyaye.
Qirkerdişê Madimakî yê Sêwasî ke 2ê Temmûza 1993î de bi destê dewlete ame viraştene de bi desan roşnvîrî ameybî qetilkerdene. Qirkerdişê Çorumî yo ke menganê Gulane û Temmûze yê 1980 vera taxa Elewîyan de ame destpêkerdene de goreyê daneyanê fermîyan tewr tay 57 kesî ameyî qetilkerdene û bi seyan zî birîndar bîyî.
BRÛKSEL