Seba wedaritişê tecrîdkerdişê Rayberê Şarê Kurdî Abdullah Ocalanî, rayberîya Hemsereka KCD’yî Leyla Guvene de Kurdistan, Tirkiye û xeylî welatan de çalakîyê grevê vêşanîye yenê viraştene. Seba paştdayîşê xoverdayîşê grevê vêşanîye 2 rojî verê Almanya de kampanyaya akerdişê afîşan dest pêkerdibî.
Afîş bi siloganê ‘Vera tecrîdî de 7 hezar’ (#7000gegenIsolation) ameyî akerdene û bi taybetî îşaret bi Leyla Guvene û 7 hezar hepsîyanê grevê vêşanîye de yê ame kerdene. Afîşan de sloganê ‘Ma bêvengîye bişiknê’ û ‘Vengê zîndanan biheşnê’ ameyî nuştene û xeylî bajaran de ameyî akerdene.
Peykerê Stortebeker û Zitronenjette yê ke sembolê Hamburgî yê, hetê bînî ra peykeranê xeylî wareyanê bajarî de êlegê sipî yê ke nîşanê çalakwananê grevê vêşanîye yê, ameyî pirodayene. Berlîn û Magdeburg de zî aktîvîstan boyayo sur meydanan de rişna û bale ante serê rewşa weşîye ya çalakwananê grevê vêşanîye.
Çalakîye vilayê xeylê bajaran bîye
Eynî afîşî bajaranê Leîpzîg, Bîelefeld, Munchen, Hannover, Tubîngen, Celle û Bonn de zî ameyî akerdene. Aktîvîstan hetê bînî ra fotogarafê afîşan antî û bi hashtaga ‘#7000gegenIsolation’ de medyaya sosyale de pare kerdî.
Kampanya hetê Têgêrayîşo Femînîst ‘Ma pîya têkoşîn bikerê’ û ‘Tatort Kurdistan’, ‘Cayê bîyayîşî Kurdistan’ ra ame organîzekerdene. Çalakwanî bi rayîrê na çalakîye wazenê bale biancê û rayberîya Berlînî bikerê mîyanê têgêrayîşî. Afîşî xeylî cayan de ameyî dardekerdene. Aktîvîstê almanyanij ê ke 25ê Nîsane sey ‘Roja çalakîyan’ îlan kerda, yeno pawitene ke heta wextêko bîn afîşan abikerê.
BERLÎN / HAMBURG